​Табатай ансамблиин тоглолто

Арадай аман зохёолой «Амар сайн» ансамбль табатай болобо. Буряад Уласай соёлой габьяата хүдэлмэрилэгшэ, Буряадай уран зохёолшодой холбооной гэшүүн, «Буряадай түрүү хүнүүд-2017» урилдаанай лауреат, уласхоорондын болон можо нютагууд хоорондын урилдаануудай ла­уреат, дуушан, хүгжэмшэн Владимир Бухаев Улаан- Үдын Аэропорт һууринда оршодог соёлой «Авиатор» байшанда зон нүхэдөө баясуулжа, хоёр часай туршада үргэлжэлһэн дуу хатарай ёһотой һайндэр бэлэглэбэ.

«Арадай сэсэн үгэнүүд соо алтанай дуһал байдаг юм», - гэжэ Буряадай элитэ уран зохёолшон Хоца На­мсараев бэшээ бэлэй. «Амар сайн» ансамблиин урданай болон мүнөөнэйшье дуунуудые гүйсэдхэхыень хаража һуухада, агуу зохёолшон зүб ажаглаа гэжэ дүн гара­на. Жаран таба наһанайнгаа эрмэг гэшхэһэн Владимир Бухаев ансамблиин залуу гэшүүдэй нэгэниинь юм. Тон үндэр наһатай дууша­ниинь Валентина Доржи­евна Дагбаева болоно. Тэрэ буряадаараа наян дүрбэтэй. Үндэр наһатай эжынэрнай, ахайнарнай буряад нюта­гайнгаа аянгата һайхан дуунуудые та бүхэндэ, арад зондоо хүргэжэ ябаһандань ехэ баясаад лэ, ута харгы­тай, һайн һанаатай, хүн зо­ной сэдьхэлыень эмшэлжэ байһан хүнүүд гээшэ гүб даа гэжэ тэмдэглэхэ байнаб.

«Амар сайн» ансамблиин буряад, ородшье дуунуудые гүйсэдхэхыень хараг­шад заалаар дүүрэн һуужа шагнаба. Артистнарай эсэ­шэ сусашагүйгөөр һаяын жэлнүүдтэ бүтээһэн ажа­лынь сэгнэгшэдэй зүрхэндэ хүрөө. Тэрэнииень гэршэл­жэ, «Авиатор» клубта энэ үдэшэ ерэһэн харагшад халуун альга ташалгаар дуун бүхэнииень угтажа, үдэшэжэ һууба. Ноёд ба­ядшье, хүдөөгэй малшад­шье, хүгшэн залуугүй баяр баясхалангаа иимэ аргаар хүргэнэ.

- Улаан-Үдэ хотын Совет­скэ районой захиргаанай ноёд дарганарта ехэ баяр­тайбди. Манай «Амар сайн» ансамль угаа бэрхэ. Олониитын һайндэрнүүдтэ ходо­доо хабаадажа, буряад ара­даа, үндэһэн соёлоо дээрэ үргэжэ, холо ойгуур дуутай суутай болонхой, - гэжэ Бу­ряад Уласай ниислэл хотын Советскэ районой захиргаа- най хүтэлбэрилэгшын ор­логшо Владислав Дармаев олоной дуулатар хэлэбэ.

Буряад арадай ёохор наа­дан, дайнай үеын вальс, шог ёгто дуунууд, нёдондо ехэ үргэнөөр тэмдэглэгдэһэн Дондог Улзытуевай наян жэлэй ойдо зорюулагдаһан шүлэгынь зэдэлбэ. Эдэ бо­лон бусад уран бүтээлнүүд һэбэрээшэг һэшхэлтэй хүнүүдые хүмүүжүүлнэ, эхэ эсэгынгээ һайхан һургаалаар ябаһан зониие да­лижуулна.

Хүүгэдэй урлигай «Фо­рус» байшангай дэргэдэ хатардаг үхибүүдэй хата­рай «Сэргэ» гэжэ бүлгэм, тэрэниие уран һайханай талаар хүтэлбэрилдэг Рос­сиин габьяата артист, «Бай­гал» ансамблиин түрүү хатаршан Сергей Аюшеев гэгшэд «Амар сайн» ансам­блиин гэшүүдые табан жэ­лэйнь ойгоор хани халуу­наар амаршалба. Хэнэйшье досоо уни бутарма дулаахан үгэнүүдые хэлэхынгээ ха­жуугаар хоёр һайхан хатар хатарба, ирагуу хүгжэмтэ дуунуудые Сергей Аюшеев өөрөө дуулажа, харагшадаа хүхеэбэ.

Буряадай арадай ар­тист Тогмид Танхаев Вла­димир Бухаевай зохёоһон «Хүнэй наһан» гэжэ дууень дабтагдашагүй һайханаар хангюурдахын хажуугаар оперын аринуудые удаа да­раалан гүйсэдхэжэ, хүн зо­ниие хужарлуулба.

Арадай дархан, дүрэ бу­ляалдалгын барилдаагаар спортын мастер, Буряад Уласай соёлой габьяата хүдэлмэрилэгшэ, Буряад Уласай уран зохёолшодой холбооной гэшүүн, Оро­дой Холбоото Уласай юрэнхы болбосоролой хүндэтэ хүдэлмэрилэгшэ, Чингис хаанай медалиин кавалер (Монгол Улас), ВДНХ-гай алтан медальда хүртэгшэ, “Буряадай түрүү хүнүүд-1999», “Россиин түрүү хүнүүд-2010” гэһэн урилдаануудай лауреат, Бүгэдэ буряадай «Алтар­гана» фестивалиин алтан медальтан Валерий Цыбиков «Мүнхын аршаан» гэжэ шүлэгөө уншаба.

Россиин коммунис на­май гэшүүн, Ородой Хол­боото Уласай Федеральна Суглаанай гэшүүн Вячеслав Мархаевай туһалагша Баяр Базаров «Амар сайн» ансам­блиин гэшүүдые табан жэ­лэйнь ойн баяраар хани халуунаар амаршалаад, Агуу Хубисхалай 100 жэлэй ойдо зорюулагдаһан медальнуудые наһажаал дуушадай энгэртэ баярай оршондо зүүлгэбэ.

Баяр ЖИГМИТОВ