​«321-я Сибирская» кинофильмтэй танилсуулга үнгэрбэ

Февралиин 1-дэ Гомбожаб Цыдынжаповай нэрэмжэтэ Буряадай оперо болон баледэй театрта «321-я сибирская» гэһэн кинофильмын танилсуулга-тоглолто боложо үнгэрбэ. Ста­линградай байлдаанда илаһанай 75 жэлэй ойн баярта зорюулагдажа, энэ фильм буулгагдаа юм. Тус байлдаанда хабаадаһан аба эсэгэнэрэй үри һадаһад эндэ суглараа бшуу.

“Агууехэ тэдэ жэлнүүдтэ доро дохиёбди” (“Поклонимся великим тем годам”) гэһэн танилсуулга-тоглолтодо шүлэглэмэл ба хүгжэмэй зохёолнуудые, зүблэлтэ сагай бо­лон мүнөөнэй авторнуудай хүгжэм дуунуудые оперо болон баледэй театрай дуушад Валентина Цы­дыпова, Намхайн Мунхзул, Михаил Пирогов болон бусад симфониче­ска оркестрэй дирижёр Валерий Волчанецкиин ударидалга доро зэдэлүүлээ.

Энэ кинофильмдэ Хоца Намса­раевай нэрэмжэтэ Буряад драмын театрай артист Дугар Жалсанов буулгагдаһан байжа, буряад хэ­лэн дээрэ хүнэй зүрхэ сэдьхэлэй доһолтор уян гоёор шүлэг уншажа, хүн зониие баясуулба.

Мүн танилсуулга-тоглолтын үедэ кинофильмын хэһэгүүд, мүн яагаад, хаана буулгагдаһаниинь харуулагдаа. Удаань тайзан дээрэ найруулагша Солбон Лыгденов, гол герой Георгий Дронов гэгшэд уриг­дажа, бултанда баяраа мэдүүлээ.

Энэ кинофильмдэ 321-дэхи буу­гай дивизиин бүридэлдэ Буряадай ба Үбэр Байгалай сэрэгшэ хүбүүдэй Сталинград хотын байлдаанда эрэлхэгээр тэмсэжэ, байһан бүхы хүсэ шадалаа гаргажа, фашистнуу­дые илаһан тухайнь харуулагдана.

Любовь ЦЫБЕНОВА

Любовь Цыбеновагай гэрэл зураг