989
Анна Огороднигой гэрэл зураг
Арбадахияа эмхидхэгдэхэ «Нүүдэлшэдэй ая дуун» гэһэн уласхоорондын фестивальда Буряад Уласаа түлөөлхэ дуратайшуул апрелиин 1 болотор мэдүүлгэ оруулха болоно. Тиихэдэ өөр тухайгаа мэдээсэхэһээ гадна, видео-, аудио- буулгабаринууда тухайгаа мэдээсэхэ хэрэгтэй гэжэ хэмжээ ябуулгын эмхидхэлэй «Нүүдэлшэдэй ая дуун. Байгал-Буряад» хороондо тэмдэглэнэ.
Буряад Уласай соёлой яаманай хэблэлэй албанай гэрэл зураг
Заншалта ёһоороо тус фестиваль Загарай аймагай Асагад һууринда июлиин 20-21-нэй үдэрнүүдтэ эмхидхэгдэхэ юм. 2018 оной футболоор дэлхэйн чемпионадай түгэсхэлэй наадануудһаа боложо, «Нүүдэлшэдэй ая дуун» мүрысөөнэй үнгэргэгдэхэ болзор хойшолуулагдаа.
«Нүүдэлшэдэй ая дуун» мүрысөөн Буряад Уласта 2009 онһоо хойшо эмхидхэгдэнэ гэжэ һануулнабди. Дэлхэйн алишье зүгһөө мүрысөөндэ хабаадаха дуратайшуулай тоо жэлһээ жэлдэ олошорно. Юһэн жэл удаа эмхидхэгдэһэн фестивальда Буряад Уласай болон Ородой Холбоото Уласуудай бусад можо нютагуудай, Хитад, Монгол, Украина, Венгри, Норвеги, Америкын Холбоото Штатуудай, Япон, Бельгии, Бразили, Зимбабве, Нигер болон бусад хари гүрэнүүдэй хүгжэмшэд хабаадаһан байна. 2017 ондо тус хэмжээ ябуулгада эгээл олон, 6,5 мянганһаа дээшэ, харагшад, суглараа гэжэ тэмдэглэхэ хэрэгтэй.
