943
Мартын 27-до театрай уласхоорондын үдэр тэмдэглэгдэдэг. Энэ үдэр Улаан-Үдын театрай хүдэлмэрилэгшэд хотын театрта сугларжа, мэргэжэлтэ һайндэрөөр бэе бэеэ амаршалдаг заншалтай.
Байгша оной мартын 27-до Н.А.Бестужевай нэрэмжэтэ ород драмын театр суг хүдэлдэг нүхэдөө урижа, «БРАВО-2018» гэһэн наада олоной һонорто дурадхаха.
Театрай уласхоорондын үдэр театрай ажал ябуулагшадай эблэл эрхим хүдэлмэрилэгшэдэй амаршалдаг заншалтай. Тиихэдэ «Эрэшүүлэй эрхим роль», «Эхэнэрнүүдэй эрхим роль», «Эхэнэрэй хоёрдохи талын эрхим роль», «Эрэ хүнэй хоёрдохи талын эрхим роль», «Эгээл эрхим найруулагша», «Эрхим сценограф», «Оперын эрхим дуушан», «Баледэй эрхим артистнууд», «Театрай эрхим алба хаагша», «Нэрэ хүндын түлөө» гэһэн номинацинуудта шангууд жэл бүри барюулагдадаг.
– «Театрай үдэр» гэһэн хэмжээ ябуулга ганса театрай хүдэлмэрилэгшэдтэ хабаатай бэшэ, харин олон тоото харагшадташье хабаатай. Тиимэһээ энэ үдэр харагшад театрта мэргэжэлтэ үдэрөө яажа тэмдэглэдэг бэ гэжэ харахаһаа гадна, эрхим зүжэгшэдөө амаршалхашье дуратай байха гэжэ хэмжээ ябуулгада харагшадаа уринабди. Харагшад хадаа театрай ажаябуулгын таһалгаряагүй хубинь болоно ха юм, - гэжэ Ород драмын театрай найруулагша Тадас Монтримас хэлэбэ.
Энэ үдэшэ Буряадай ниислэл хотын бүхы театрнууд хабаадаха: Н.А.Бестужевай нэрэмжэтэ ород драмын театр, Х. Намсараевай нэрэмжэтэ Буряад драмын театр, Буряадай оперо болон баледэй театр, Хүүхэлдэйн «Үльгэр» театр, Залуушуулай уран һайханай театр.
