919
Эдир хүгжэмшэдые дэмжэһэн Уласхоорондын “Найдал” гэһэн мүрысөөн 5-дахияа Улаан-Үдэдэ мартын 26-29-эй үдэрнүүдтэ үнгэргэгдэхэ.
“Найдал” хадаа эдир хүгжэмшэдые дэмжэһэн уласхоорондын хэмжээнэй уласай ори ганса мүрысөөн юм. Байгша оной хүгжэмэй мүрысөөндэ Ородой Холбоото Уласай арба гаран можонуудай 460-аад эдиршүүл, тиихэдэ Монгол болон Хитад гүрэнүүдэй хүгжэмшэд хабаадахаар хараалагдана.
1997 онһоо хойшо эхиеэ абаһан мүрысөөн 2005 онһоо хойшо уласхоорондын хэмжээндэ үнгэргэгдэнэ. Тиигэжэ бэлиг талаантай хүгжэмшэдые тодоруулдаг “Найдал” гэжэ мүрысөөн дүрбэн жэлэй нэгэ дахин эмхидхэгдэдэгшье һаа, Буряадһаа гадуур мэдээжэ болонхой. Энэ мүрысөөндэ таба наһатайһаа аха үхибүүд хабаададаг.
Буряад Уласай соёлой яаманай хэблэлэй албанһаа гэрэл зураг абтаба
- Бэлиг талаантай, залуу хүгжэмшэдые элирүүлхэ, дэмжэхэ зорилготой “Найдал” мүрысөөн ехэ удха шанартай, - гэжэ Буряад Уласай соёлой сайд Соёлма Дагаева хэлэһэн байна.
Мэргэжэлтэдэй тэмдэглэһээр, «Найдал» мүрысөөндэ хадаа эдир хүгжэмшэдые ерээдүйнгээ мэргэжэл шэлэлгэдэ нүлөөтэй юм.
“Найдалай” эгээл мэдээжэ лауредуудай П. И. Чайковскиин нэрэмжэтэ уласхоорондын XV конкурсдо илагша, пианист Дмитрий Маслеев болоно. Тэрэ 2001 оной мүрысөөндэ илалата туйлаһан юм. Видеохолбоодо гаража, Дмитрий Маслеев эдир хүгжэмшэдтэ эрхимээр хабаадахыень, шүүгшэдтэ эгээл бэлигтэйшүүлые элирүүлхыень хүсэбэ.
Ородой Холбоото Уласай габьяата артистнар, Ород болон хари гүрэнүүдэй хүгжэмэй ехэ һургуулинуудай профессорнууд шүүгшэдэй тоодо оронхой.
- Жэлһээ жэлдэ энэ мүрысөөн улам далижажа, хүгжэмэй хэдэн шатын һургуулинуудые нэгэдүүлнэ. Һайшаалтайнь гэхэдэ, хабаадагшадай тоо жэл ерэхэ бүри олон болоно, - гэжэ П.И. Чайковскиин нэрэмжэтэ соёл урлагай колледжын захирал Баир Турбянов хэлэбэ.
Бэлиг талаантай үхибүүд Бах, Чайковский, Гендель, Бетховен болон буряад хүгжэмшэдэй аялга фортепиано, духовой, ород арадай болон Ород гүрэнэй болон Ази-Номгон далайн хизаарай үндэһэтэнэй арадай хүгжэмэй зэбсэгүүд дээрэ хангюурдаха.
“Найдал - 2018” мүрысөөнэй нээлгын баяр ёһолол соёлой колледжжо мартын 226-да үглөөнэй 10 сагта үнгэргэгдэхэ юм. Удаань ниислэл хотын хүгжэмэй һургуулинууд болон Буряадай гүрэнэй филармонидо, соёлой колледждэ шэлэн абалгын шатанууд үнгэргэгдэхэ. Мартын 28-да мүрысөөнэй айлшан, Москвагай гүрэнэй филармониин түрүү хүгжэмшэн, пианистка Екатерина Мечетинагай тоглолто эмхидхэгдэхэ. Мартын 29-дэ, фестивалиин һүүлшын үдэр, хүгжэмэй мэдээжэ багшанар болон жюриин гэшүүд мастер-классуудые үнгэргэхэ. Мартын 29-дэ Буряадай гүрэнэй оперо болон баледэй театрта “Найдал – 2018” гэһэн мүрысөөнэй илагшадые амаршалгын ёһолол болон гала-тоглолто үнгэрхэ юм. 5-дахияа үнгэргэгдэхэ мүрысөөндэ зорюулан, мэдээжэ скульптор Жигжит Баясхаланов «Гран-при» гэһэн кубок бүтээхэ.
