​Ирагуу найрагша Илья Резнигтэй нүхэсэл

Байгша оной апрелиин 28-да Москвада Ородой Холбоото Уласай эрдэмэй академиин томо танхим дотор «Кижинга» гэжэ шэнэ дуунтай танилсалга үнгэрхэ. Хэрбэеэ энэ дуунай хүгжэмынь Цырен Шойжонимаев ба Алагуй хоёрой һаа, үгыень Россиин хэмжээндэ мэдээжэ ирагуу найрагша Илья Резник зохёоһон байна.

Мүнөө дээрээ буряадуудай шлягер болонхой “Түрүүшын дуран” гэжэ дуунай автор, хүгжэм зохёогшо Цырен Шойжонимаев хэбэд номхон Хэжэнгэһээ гарбалтай тула нютагтаа зорюулһан дуу бэшүүлһэниинь гайхалгүй. Тиихэдээ иимэ үндэр нэрэ солотой Россиин арадай артист Илья Резнигтэ хандаhаниинь бүришье һайшаалтай. Буряадтаа нигүүлэсхы сэдьхэлэй удхатай олон тоото тоглолтонуудые эмхилхэгшэ эстрадын дуушан Ринчин Дашицыренов энэ дуу гүйсэдхэнэ.

Цырен Шойжонимаев продюсерска түб байгуулаад, үргэн олониитэдэ үргэлжэ шэнэ тоглолтонуудые дурадхаһаар бшуу. Гадна шэнэ нэрэнүүдтэйшье танилсуулна. Москвада үнгэрхэ тоглолтодо ород, буряад, хальмаг болон монгол эстрадын дуушад оролсохо юм. Тиигэжэ олон үндэһэ яһатаниие нэгэдүүлһэн ехэ хэмжээн болохо.

Цырен Шойжонимаевай хабаадалгатайгаар бэлигтэй ирагуу найрагша Нина Ленхобоева-Артугаевагай тоосоото үдэшэ Улаан-Үдэдэ мартын 28-да үдэшын 18.00 сагта «Феникс» түбтэ үнгэрхэ гээд һануулая.

Тобшо мэдээн

Илья Рахмиэлевич Резник – Зүблэлтэ засагай үеһөө Бүхэроссида мэдээжэ болоһон дуунуудай үгэ зохёогшо, Ородой Холбоото Уласай болоод Украинын арадай артист, Россиин уран һайханай академиин хүндэтэ гэшүүн мүн. Тэрэ 1934 ондо Ленинградта түрэһэн. Дайнай үедэ фашис булимтарагшадай Ленинград хото хүреэлэлгэндэ ороһон байна. Хожомынь, һургуули түгэсхэһэнэй удаа, лаборантаар, электригээр, тайзан бэлдэлгэдэ юрын хүдэлмэрилэгшөөршье ажаллаһан.

1958 ондо Ленинградай гүрэнэй театрай, хүгжэмэй болон киногой дээдэ һургуули дүүргэһэн.

Максим Дунаевский, Раймонд Паулс, Александр Журбин болон бусад элитэ хүгжэмшэдэй найруулга доро шүлэгүүдые зохёоһон. Илья Резнигэй дуунуудые Николай Караченцев, Михаил Боярский, София Ротару, Александр Градский гэгшэд дууладаг.

1972 онһоо хойшо Алла Пугачёватай хамта зохёохы ажалаа эхилһэн. Эгээл тиихэ үеэр эстрадын эрхим дуушанай эгээл мэдээжэ дуунууд мүндэлһэн. 1990-ээд онуудта Америкэдэ ажаһууһан. 2006-2009 онуудта «Две звезды» гэжэ шоудо жюриин үүргэ дүүргэһэн.