1001
Байгша оной апрелиин 9-дэ «Capitall Mall» гэһэн худалдаа-наймаанай түбтэ «Хүхюу буряад-2018» гэһэн шог ёгто дуратайшуулай мүрысөөн буряад хэлэн дээрэ үнгэргэгдэхэ. Удаань, апрелиин 10-да, Буряад драмын театрта мүрысөөнэй түгэсхэлэй шата эмхидхэгдэхэ юм.
Буряад Уласай соёлой яаманай хэблэлэй албанай гэрэл зураг
Шог зугаагай, хүхюу энеэдэнэй мүрысөөндэ хабаадаха дуратайшуулда наһанай, үндэһэ яһанай талаар ямаршье хизаарлалта үгы. Тиихэдэ хабаадагшад арадайнгаа хубсаһаа үмдэжэ, мүрысөөндэ хабаадаха болоно.
«Хүхюу буряад» мүрысөөн «Эрхим хөөрэгшэ» болон «Эрхим зүжэг» номинацинуудаар үнгэргэгдэхэ. Ганса хүнэй хабаадаха «Эрхим хөөрэгшэ» номинацида наһанай зургаан бүлэгүүдтэ ямаршье яһанай зон гурба минутаһаа үлүү бэшэ сагта хабаадаха аргатай. Энэ номинацида буряад бэшэ яһанай хүнүүдтэ «Буряад хэлэ эрхим мэдэгшэ» гэһэн тусхай шан барюулагдаха. Харагшадай зүрхэ сэдьхэл буляажа шадаһан хүн «32 шүдэн» гэһэн харагшадай шанда хүртэхэ юм.
«Эрхим зүжэг» номинацида арбанһаа дээшэ бэшэ хүн, наһанай хизаарлалтагүйгөөр хабаадаха аргатай. Энэ мүрысөөндэ үндэһэтэнэй хубсаһан, бэлиг талаан, хэр зэргэ зүжэгэй удха зүбөөр харуулааб гэхэ мэтэ сэгнэгдэхэ.
