1849
Байгша оной майн 11-дэ үдэрэй 12 сагһаа “Буряад хэлэ сахин хүгжөөлгэ” гэһэн программын хэмжээндэ буулгагдаһан кинонуудые Улаан-Үдэ хотын ажаһуугшад болон айлшад хараха аргатай.
Дэлхэйн соёлой һалбариин баялиг үндэһэтэ арадуудай хэлэн болон соёл урлаг болоно гэжэ бултанда мэдээжэ. Буряад уласта буряад хэлэ сахин хүгжөөхэ талаар хэмжээ ябуулганууд олоор үнгэргэгдэнэ. «Буряад Уласта буряад хэлэ сахин хүгжөөлгэ», «Гүрэнэй болон нютагай засагай байгууламжануудай номой санда буряад хэлэн дээрэ хэблэгдэһэн номуудай жаса» гэһэн гүрэнэй программанууд байгуулагданхай. Хэмжээ ябуулгануудые үнгэргэлгэдэ мүнгэн һомологдоно. 2007 онһоо хойшо «Буряад хэлэнэй үдэр» гэһэн уласай хэмжээ ябуулга үргэн дэлисэтэйгээр үнгэргэгдэнэ. Һүүлэй жэлнүүдтэ Буряадай ирагуу найрагшад, уран зохёолшод, зүжэгшэд болон уран зураашадай зохёохы замда зорюулагдаһан фильмүүд эдэбхитэй буулгагдана.
Буряад Уласай соёлой яаманай хэблэлэй албанһаа гэрэл зураг абтаба
Тиимэһээ буулгагдаһан баримтатай фильмүүдтэй үргэн олониитэ танилсуулха зорилготой «DocFest» гэһэн хэмжээ ябуулга Буряад Уласай Үндэһэтэнэй номой санда үнгэргэгдэнэ. Майн 11-дэ үдэрэй 12 сагта «Хурист» гэһэн анимациин кино харуулагдаха. 13 сагта ирагуу найрагша Дондок Улзытуевэй зохёохы замда зорюулагдаһан баримтата фильм олоной һонорто дурадхагдаха. Удаань 14 сагһаа арадай уран зохёолшод Цырендулма Дондогой болон Николай Дамдиновта зорюулагдаһан кино харуулагдаха. Үдэрэй 15 сагта Буряад Уласай Үндэһэтэнэй номой сангай «Мүнгэн сэдьхэл» гэһэн кино ажаһуугшад хараха аргатай. Тиихэдэ 16 сагта П.И. Чайковскийн нэрэмжэтэ соёл урлагай колледжын «1975 оной алтан хэблэл» гэһэн фильм олондо дурадхагдаха. Буряадта буулгагдаһан баримтата фильмүүдтэй танилсалгын үедэ номуудай үзэсхэлэн дэлгэгдэхэ юм.
