802
Түнхэн аймагай Хужар һууринда үнгэрһэн долоон хоногто соёлой талаар баяртай ушар болоһон байна. “Сагаан турлааг” гэһэн рок-бүлгэм өөрын тусхай абяа буулгадаг ба дуунуудые бэшэдэг студи нээбэ.
Хэмжээ ябуулгада нютагай зон олоор суглараа. Мүн хүндэтэ айлшад һайхан үгэнүүдые хэлэжэ, “сагаан турлаагуудые” амаршалаа. Түнхэн аймагай засаг даргын уялгануудые саг зуура дүүргэгшэ Вячеслав Цыбикжаповай, Буряад Уласай Арадай Хуралай һунгамал Ким Галсановай хабаадахадань, тус үйлэ хэрэг ехэ удха шанартай гэжэ ойлгохоор байгаа.
“Сагаан турлааг” оройдоол дүрбэн жэлэй саана түрүүшынгээ алхамуудые хэһэн байна. Абаһаар лэ, тэдэ олондо һайшаагдаа. Юуб гэхэдэ, “Сагаан турлааг” ехэнхидээ хард-рок гуримаар хүгжэм зэдэлүүлжэ, дуунуудые хангюурдадаг. Тиихэ зуураа энэ маягаар зохёогдоһон олон буряад дуунуудые гүйсэдхэнэ.
Байгалай эрье дээрэ Байкальскда эмхидхэгдэдэг мэдээжэ рок-хуралдаанда амжалтатайгаар хабаадаһан байна. Мүн тиихэдэ Эрхүү, Улаан-Үдэ хотонуудта үнгэргэһэн тоглолтонуудтань аргагүй олон хүн суглараа. 2017 ондо “Нүүдэлшэдэй ая дуун” гэһэн уласхоорондын хуралдаанда хабаадаа. Бүхы дэлхэй дээрэ мэдээжэ “Калинов мост” гэһэн рок-бүлгэм энэ хэмжээ ябуулгада хабаадаа бэлэй гээд һануулая. Мүнөөшье жэл “Сагаан турлааг” Загарай аймагай Асагад һууринай талада болодог тус хуралдаанда дахинаа уригдаа.
"Sagaan Turlaag Records" гэһэн студида ганса өөһэдөө дуунуудаа бэшэхэ бэшэ юм. Бүлгэмэй артистнарай хэлэһээр, дуу бэшүүлхэ, шүлэгөө хүгжэмдэ тааруулха дуратайшуултай тэдэ нягта харилсаатай байха.
- Энэ студи нээхэ хэрэгтэмнай нютагаймнай зон ехэ туһалаа. Зариманиинь барилгын, шэрдэлгэ сагаадалгын хэрэгсэлнүүдые дамжуулаа, нүгөө зариманиинь мүнгэ суглуулжа үгөө. Түнхэн аймагай сомонуудай дарганар, һунгамалнууд туһа хүргөө. Тиихэдэ Туран һууринай 11-дэхи ангиин һурагшадай мүнгэ суглуулжа үгэхэдэнь, ехэ уяраад абаабди. Аймагай соёлой таһагай болон түбэй соёлой байшанай хүдэлмэрилэгшэд бидэнтэй суг хамта хүдэлөө. Хоёр һарын туршада шанга ажал хэжэ байхадамнай, олон хүн гэрһээнь эдеэ хоол асаржа, садатарнай хооллуулжа байгаа, - гэжэ тус бүлгэмэй түрүү хүгжэмшэн Доржо Зандеев хөөрэнэ.
Гол дуушан Валерий Сыбенов хадаа Хужарай сомоной дарга юм. Нютагайнгаа соёлой байшан нүхэдтөө дурадхаһаниинь гайхалгүй. Юуб гэхэдэ, “Сагаан турлааг” тоглолтонуудта бэлдэхэ, шэнэ дуу, хүгжэм найруулха тусхай байрагүй байгаа бшуу.
Хужарай соёлой байшан аяар 1960-аад онуудта бодхоогдожо, баян түүхэтэй юм. 80-90-ээд онуудта эндэ “Мүнхэ бадар” гэһэн арадай театр ажалаа ябуулжа, нютаг нугаяа холо ойгуур суурхуулһан байна. Хэдэн жэлэй саана эндэ “Черный альпинист” гэһэн эстон уран һайханай фильм буулгагдаа һэн.
- 2017 ондо бидэ соёлойнгоо байшан заһабарилжа эхилээбди. Нютагаймнай зон мүнгэ суглуулжа, өөрын хубита оруулаа. Түнхэн аймагһаа Арадай Хуралай һунгамалнууд Ким Галсанов болон Борис Ботоев гэгшэд ехэнхи мүнгэ дамжуулаа. Харагшадай зал соо гурбан томо евросонхо тодхогдоо. Байшан дулаасуулхын тула гурбан түмэр пеэшэ абаад, хоёрыень зал соо, нэгыень фойе соо табяабди. Үүдэнүүд шэнэлэгдээ, - гэжэ Валерий Сыбенов хөөрэнэ.
Гэбэшье соёлой байшан соо үшөө хэдэн таһалга орхигдоһон зандаа үлөө. Эгээл ехыень “Сагаан турлааг” шэлэжэ, заһабарилгын ажал ябуулжа, студи байгуулаа. Иимэ суутай соёлой байшан соо өөһэдын булан олоһон “Сагаан турлааг” саашадаа ганса Хужар нютагаа бэшэ, Түнхэнөө болон бүхы Буряадаа суурхуулхань магадгүй.
Валерий Сыбенов гэрэл зураг дамжуулаа
Автор: Борис БАЛДАНОВ
