921
Буряад Уласай Үндэһэтэнэй номой санда Даши-Нима Дугаровай түрэһөөр 85 жэлэйнь ойдо зорюулагдаһан олониитын суглаан һаяхан үнгэрөө. Уран урлалай оршондо мэдээжэ болоһон Даши-Нима Дугаровай зохёохы зам тухай суглаан дээрэ дэлгэрэнгыгээр хэлсэгдээ, һургагша, хүмүүжүүлэгшэ, нүхэр тухай дурсалганууд дурадхагдаа.
“Хүлгөөтэ 1990-ээд онуудай бэрхэшээлтэ үедэ буряад арадайнгаа түүхэ намтар, ёһо заншал һэргээхэ зорилготойгоор нэгэдэхи съезд дээрэ Буряад Уласай Бүгэдэ буряадай соёл хүгжөөлгын эблэл ударидажа, түрүүшын Юрэнхылэгшээр томилогдоһон байна”,- гээд, мүнөө Бүгэдэ буряадай соёл хүгжөөлгын эблэлэй Юрэнхылэгшэ Иннокентий Егоров суглаа нээхэдээ тэмдэглэһэн байна.
Буряад арадайнгаа түлөө үнэнхэ зүрхэнһөө оролдожо, хэжэ ябаһан ажалаараа нэрэеэ мүнхэлжэ шадаһан Даши-Нима Дугаровай буряад соёлой хүгжэлтэдэ оруулһан үүргэнь нилээдгүй ехэ.
Буряад Уласай Толгойлогшын болон Засагай газарай Захиргаанай Яһатанууд хоорондын харилсаануудай болон эрхэтэдэй үүсхэл хүгжөөлгын хорооной түрүүлэгшэ Михаил Харитонов, Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын ба шажан мүргэлэй нэгэдэлнүүдэй талаар хорооной түрүүлэгшэ Цыденжап Батуев болон бусадшье сугларагшадта элидхэлнүүдые дурадхаба.
Буряад Уласай Үндэһэтэнэй музейн хүдэлмэрилэгшэ Татьяна Алексеева элидхэл соогоо Даши-Нима Дугаровай олохон лэ бүтээлнүүд Цыренжап Сампиловай нэрэмжэтэ уран һайханай музейдэ хадагалагданхай. Тиихэдэ Москва хотодо Ородой Холбоото Уласай Соёлой яаманай ба уран зурагай жасын суглуулбаринуудта онсо һуури эзэлдэг тухайнь тобшохоноор хөөрэжэ үгөө.
Суглаанай түгэсхэлдэ Даши-Нима Дугаровай хүбүүн, Буряад Уласай габьяата уран зураашан, уран барималша Дугаров Зандан Дашинимаевич тус хэмжээ ябуулга эмхидхэгшэдтэ баярые хүргөө. “Абымнай мүнхэ дурасхаалта уулзалгада хабаадагшадта, зохёохы ажалайнь урагшатай алхамуудыень һайханаар дурсажа ябаһан та бүгэдэндэ баярые хүргэнэб”, - гэжэ тэрэ тэмдэглээ бшуу.
Номой сангай фойе соо уран зураашанай үзэсхэлэн дэлгээгдээ, тиихэдэ өөрын архивта хадагалагдажа байһан эдлэлынь сугларагшадай үзэмжэдэ мүн лэ дурадхагдаһан байха юм.
“Буряад үнэн” мэдээсэлэй албан
