908
Буряад АССР-эй сайдуудай зүблөөнэй тогтоолоор 1983 ондо ЛВРЗ-эйн соёлой ордондо нютаг можын удха шанартай хүшөө гэһэн нэрэ зэргэ олгогдоһон юм. ЛВРЗ-эйн соёлой байшанай баярай үдэшэ Буряад Уласай 95 жэлэй болон хотын Түмэр замай хороогой 80 жэлэй ойдо дашарамдуулагдана.
Июниин 9-нэй үдэр ЛВРЗ-эйн соёлой түбэй дэргэдэхи талмайда үдэрэй 15.00 сагhаа эхилээд,үдэшын 22.00 хүрэтэр тус һайндэртэ зорюулагдаhан хэмжээ ябуулганууд үргэн дэлисэтэйгээр үнгэргэгдэхэ.
«Дээдэ-Үдын яармаг» гэһэн анимациин түсэл үдэрэй 15.00 сагта эхилхэ. Эндэ худалдаа наймаанай хотын үйлэдбэринүүд үзэсхэлэн дэлгэхэ. Хотын ажаһуугшад болон айлшад Голдобиной “Чайная лавка” гэһэн үзэсхэлэндэ хүрэжэ, ретро-фотоателье орожо хараха аргатай.
«Эб найрамдалай һолонго» гэжэ хүүгэдэй уран бэлигэй 4-дэхи фестиваль үдэшын 16.30 сагта эхилхэ. Энэ хэмжээ ябуулгада хотын Түмэр замай хороогой соёлой эмхи зургаануудай болон хүүгэдэй сэсэрлигүүдэй уран һайханай бүлгэмүүд хабаадаха. Уран бэлигэй фестивальда Ородой Холбоото Улас болон Буряад Уласта ажаһуудаг үндэһэ яһатанай соёлой өөрын онсо маяг харуулха гэһэн зорилготой.
Үдэшын 18.00 сагта һайндэрые нээлгын баярай тоглолто эхилхэ. Энэ хэмжээ ябуулгада ЛВРЗ-эйн соёлой ордондо хүдэлһэн хүнүүд болон тэдэнэй олон жэлэй туршада хэһэн ажал тухай зондо хөөрэхэ. Хотын ажаһуугшад болон айлшад соёлой түбтэ ажалаа ябуулдаг хатарай, дуунай студинуудай уран һайханай бүтээлнүүдые хараха аргатай.
Тиихэдэ энэ үдэшэ уран һайханай бүлгэмүүд амаршалгын концертдэ хабаадалсаха. Ород дуун, хатарай«Забава» гэһэн театр баярай хэмжээ ябуулга нээхэ. Удаань үдэшын 20.30 сагһаа 22.00 болотор залуушуулда зорюулагдаһан хэмжээ ябуулганууд үнгэргэгдэхэ.
Үдэшын 22.00 сагта баяр ёһолол гэрэлэй тусхай наадаар түгэсэхэ.
