1091
Буряад уласай соёлой яаманай хэблэлэй албанай гэрэл зураг
Хүүгэдэй болон залуушуулай цирковой бүлгэмүүдэй уласхоорондын 5-дахи фестиваль үнгэрбэ. Гала-тоглолто гайхамшагта гоёор ябуулагдаа. Эдир уран бэлигтэн шадабарияа харуулжа, жюриин гэшүүдые уян нугархайгаараа, һайн бэлдэлгээрээ гайхуулба. “Аватар” гээд номерой түлөө монгол бүлгэм Гран-при шанда хүртөө.
6-тайһаа 14 наһа хүрэтэр мүрысөөнэй шатада Ангарск хотын “Гладиаторы” бүлгэмэй хабаадагша, агаарай гимнаст Семен Ушаков түрүү һуури эзэлээ. Каучук гээд номерой түлөө уласай цирковой һургуулиин басагад 14-тэйһээ 25 наһа хүрэтэр шатада түрүү һуурида хүртэбэ.
Тиигэжэ фестивалиин хабаадагшад Үндэһэтэнэй номой сангай, “Байгал” театрай, Буряадай филармониин шагналнуудаар урмашуулагдаа.
Монгол бүлгэмэй хүтэлбэрилэгшэ Чинбаатар Урангоогой хэлэһээр, бүлгэмынь буряад фестивальда түрүүшынхиеэ хабаадаа. Тус мүрысөөндэ Улаан-Баатарай продюсерска уран бэлигэй түбэй эгээл эдир артистнар хабаадаба.
-Бидэниие фестивальда уриһыень баяртай байнабди. Гран-прида хүртэһэндөө үшөө ехээр баярлаабди. Энэ шагнал манай ажал ехээр сэгнэбэ , - гээд Чинбаатар Урангоо хэлээ.
Ангарск хотын эдир артист Семен Ушаков гурбан жэлэй туршада цирковой һургуулида ябадаг. Тэрэ энэ хэмжээ ябуулгада түрүүшынхиеэ хабаадаа.
Хэмжээ ябуулгада 130 хабаадагшад Амурай можын Белогорск, Усолье-Сибирское, Ангарск, Хойто Байгал хотонуудһаа хабаадалсаа. Фестивалиин жюриин түрүүлэгшээр ородой арадай артист, “Дэлхэйн эрхим жонглёр” нэрэ зэргэ зүүгшэ Сергей Игнатов ажаллаба.
