1193
Байгша оной сентябриин 24-дэ Буряадай оперо болон баледэй театрта Монголой оперо болон баледэй дуушадай хабаадалгатай тоглолто үнгэргэгдэбэ. «Буряадай оперо болон баледэй театрай алтан баритон» гэжэ нэрлэгдэһэн Намхайн Мунхзул болон Ганбаатар Ариунбаатар, «Монголой алтан гургалдайнууд», дуунай уласхоорондын мүрысөөнүүдэй лауреадууд - Б. Эрдэнэтуяа (сопрано), О. Уянга (сопрано), С. Мөнгөнцэцэг (сопрано), Б. Энхнаран (сопрано), Б. Батжаргал (тенор) и О. Хүрэлбаатар (бас) гэгшэд харагшадай шэхэ хужарлуулаа.
Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов, соёлой сайд Соёлма Дагаева гэгшэд Монголой дуушадые амаршалһан байна.
Тиихэдэ Буряад Уласай Толгойлогшо Алексей Цыденовэй баярай бэшэг оперо болон баледэй театрта уншагдаа.
- Хүндэтэ нүхэд! СССР-эй арадай артист Гомба Цыдынжаповай нэрэмжэтэ Буряадай оперо болон баледэй театрай тайзан дээрэ «Монголой алтан гургалдайнуудта» баяр хүргэнэб. Балгансурэнгийн Эрдэнэтуяа, Унушихбаярын Уянга, Баярсайханы Батжаргал, Содномцэрэнгийн Мөнгөнцэцэг, Баасансүрэнгийн Энхнаран, Оюунчимэгийн Хүрэлбаатар – таанадые бидэ һайн мэдэнэбди.Монгол болон Буряад уласуудые нэгэдүүлһэн хэмжээ ябуулганууд олон, ёһо заншал, соёлнай адли. Тэрэ тоодо Сагаалган – Цагаан сар, Наадам – Сурхарбан -арадай һайндэрнүүд!
Эдэй засаг, олзын хэрэг эрхилэлгэ, болбосорол, эрдэм ухаан, тамир, элүүрые хамгаалгын һалбаринуудта Монгол гүрэнтэй ажалаа суг ябуулнабди. Жэл бүри соёлой яаман Монгол гүрэнтэй хамта гушаад түсэл бэелүүлдэг. Тиихэдэ Буряад уласай омогорхол – 14 жэлэй туршада манай театрта дуулажа ябаһан Буряад Уласай арадай артист Намхайн Мунхзул, П.И. Чайковскиин нэрэмжэтэ уласхоорондын мүрысөөнэй Гран-при шанда хүртэһэн, Великобританида BBC Cardiff Singer of the World мүрысөөнэй илагша Ганбаатар Ариунбаатар.
Буряад, Монгол уласуудай харилсаа холбоо улам бэхижүүлхэ, хүгжөөхэ талаар ажалаа үргэлжэлүүлхэбди. Ажалдатнай амжалта, элүүр энхэ, золтой жаргалтай ябахыетнай хүсэнэб! – гэһэн баярай үгэнүүдээр уласай хүтэлбэрилэгшэ Монголой дуушадта хандаһан байна.
Монголой эрхим дуушад оперын классикын алтан жасаһаа, буряад болон монгол хүгжэм найруулагшадай дуунуудые, романснуудые зэдэлүүлээ. Энэ тоглолтодо Виталия Шевелевэй хүтэлбэри доро Буряадай оперо болон баледэй театрай симфоническа оркестр, театрай уран һайханай хүтэлбэрилэгшэ, Ородой Холбоото Уласай арадай артистка Дарима Линховоин гэгшээд хабаадаа.
Тоглолтын түгэсхэлдэ Буряад Уласай соёлой сайд Соёлма Дагаева У. Уянга, Г. Ариунбаатар, Б. Эрдэнэтуяа гэгшэдтэ Монгол, Буряад уласуудай соёлой харилсаа хүгжөөлгэдэ хубитаяа оруулһанайнь түлөө баярай бэшэгүүдые барюулаа.
Буряад Уласай соёлой яаманай хэблэлэй албанай гэрэл зураг
