1190
Мүнөөдэр, октябриин 26-да, Буряад драмын театрта буряад хэлэнэй габшагай һарын дүнгүүд согсологдохо.
Буряад Уласай Засагай газарай захирамжаар улас дотор жэл бүри октябрь һарада Буряад хэлэнэй үдэр тэмдэглэгдэдэг. Буряад хэлэнэй габшагай һарын үедэ уласай бүхы аймагуудта олон тоото хэмжээ ябуулганууд эмхидхэгдэдэг юм.
Буряадай ниислэл хотодо болбосоролой эмхинүүдтэ буряад хэлэнэй үдэрнүүд үнгэргэгдөө. Буряадай гүрэнэй ехэ һургуулида доцент, профессорнууд лекцинүүдые уншаа, «Буряадаар уншая» гэһэн можо хоорондын чемпионат үнгэргэгдөө. Буряад уласай багшанарай колледждэ «Эрдэм бэлигэй дээжэ» гэһэн наадан эмхидхэгдээ. Оюутад буряад хэлэ, ёһо заншал хэр зэргэ мэдэхэ байһанаа шалгаһан байна. Улаан-Үдын 47-дохи һургуулида 7-9-дэхи ангинуудай һурагшадай дунда «Мэргэн бодол» гэһэн хотын III наадан үнгэргэгдөө. Энэ хэмжээ ябуулгада хотын 20 һургуулинуудай зуунһаа дээшэ шабинар хабаадаа.
Тиихэдэ «Шэгшүүдэйн нааданууд» гэһэн театрай зүжэгүүдэй хотын мүрысөөн хүүгэдэй сэсэрлигүүдэй үхибүүдэй дунда үнгэргэгдөө. Тус мүрысөөндэ 5-7 наһатай 300-һаа дээшэ хүмүүжэмэлнүүд хабаадаһан байна.
Октябриин 20-до Ивалгын дасанда Буддын шажантанай заншалтай Сангхын үүсхэлээр, Буряад Уласай Засагай газарай Захиргаанай дэмжэлгээр «Эхэ хэлэн-манай баялиг» гэһэн наадан эмхидхэгдээ. Буряад хэлэнэй 25-дахи нааданда Эрхүү можын, Үбэр Байгалай хизаарай болон уласай 15 аймагуудай команданууд хабаадаа.
Соёлой эмхинүүдтэ буряад хэлэнэй габшагай һарын хэмжээ ябуулганууд баһал үнгэргэгдөө. Буряад Уласай Үндэһэтэнэй музейдэ «Дэлхэйн уран зохёолой дээжэ буряад хэлэн дээрэ» гэһэн үзэсхэлэн дэлгэгдээ, «Докфест» гэһэн баримтата фильмүүдэй фестиваль эмхидхэгдээ. «Буряад Уласта буряад хэлэн сахин хүгжөөлгэ» гэһэн программын хэмжээндэ буулгагдаһан фильмүүд харуулагдаа.
Буряад хэлэнэй габшагай һарын үедэ үнгэргэгдэһэн хэмжээ ябуулгануудта илагшадые шагналгын баяр ёһолол Буряад драмын театрта мүнөөдэр үдэшын 16.30 эмхидхэгдэхэ.
Анна Огороднигой гэрэл зураг
