1005
Буряадай гүрэнэй филармонидо «Тоонто нютаг тухай эрхим дуун» гэһэн интернет-мүрысөөнэй дүнгүүд согсологдожо, гала-концерт ноябриин 13-да эмхидхэгдэхэ.
Буряад Уласай байгуулагдаһаар 95 жэлэй ойн баярта зорюулагдаһан «Тоонто нютаг тухай эрхим дуун» гэһэн уласай интернет-мүрысөөн хоёр шатада эмхидхэгдээ. Улаан-Үдэ хотын болон Буряад Уласай аймагуудай хүгжэм найруулагшад мүрысөөндэ хабаадаха тухай мэдүүлгэнүүдые оруулһан байна. Мүрысөөнэй хоёрдохи шатын дүнгүүдээр хүгжэм найруулагшадай 15 дуун шэлэн абтагдаа.
«ВКонтакте» сүлжээндэ эрхим дуунуудай түлөө дуугаа үгэлгэ эмхидхэгдээ. Энэ хэмжээ ябуулгада 7,5 мянганһаа дээшэ хүн хабаадаһан байна. «Тоонто нютаг тухай эрхим дуун» гэһэн мүрысөөнэй шүүгшэд баһал эрхим дуу шэлэбэ. Жюриин гэшүүдэй болон Буряадай ажаһуугшадай һанамжанууд илгаатай гү гэжэ интернет-мүрысөөнэй тоглолтын үдэшэ мэдэгдэхэ. Тиихэдэ энэ үдэшэ Буряад эстрадын одод болон дуунуудай авторнууд эрхим дуунуудаа гүйсэдхэхэ юм.
Буряад Уласай соёлой яаманай гэрэл зураг
