1151
Анна Огороднигой гэрэл зураг
«Баатар. Дангина» гэһэн можо хоорондын мүрысөөнэй шэлэн абалгын шата мүнөөдэр, февралиин 26-да, П.И. Чайковскийн нэрэмжэтэ соёл, урлагай колледждо үнгэргэгдэхэ. Энэ хэмжээ ябуулгада Буряад уласай аймагуудай, Улаан-Үдэ хотын болон Эрхүү можын бэлиг талаантай хүбүүд, басагад хабаадаха. Февралиин 27-до Н. Бестужевай нэрэмжэтэ ород драмын театрта мүрысөөнэй түгэсхэлэй шата үнгэрхэ. Хабаадагшад буряад арадай ёһо заншал хэр зэргэ мэдэхэ байһанаа харуулжа, өөр тухайгаа, уг гарбал, түрэл нютаг, нютагайнгаа суута хүнүүд тухай хөөрэхэ юм.
Мүрысөөнэй эдир хабаадагшад өөр тухайгаа, нүхэд тухайгаа шог ёгто хөөрөөнүүдые бэлдэхэ. Хүбүүд хүсэ шадалаа туршаха, аха зон үреэлнүүдэй мүрысөөндэ хабаадаха. Тиихэдэ хабаадагшад зохёохы бэлиг талаангаа дүүрэн харуулха аргатай, эдэнэр дуулажашье, хатаржашье зониие хужарлуулха юм. Заншалта ёһоороо мүнөө үедэ тааруулан оёгдоһон заншалта буряад хубсаһанай мүрысөөн олоной һонирхол татаха.
«Дангина», «Эдир Дангина» гэһэн номинацинуудта илагшад мэдээжэ алташа, мүнгэшэ дархан Владимир Табитуевай бүтээһэн гоё һайхан титимдэ хүртэхэ юм. Владимир Табитуев энэ мүрысөөндэ гоё һайхан бүтээлнүүдые һиилэжэ байдаг гээд тэмдэглэлтэй.
Уласай уран бүтээлэй түбэй мэдээсэлэй албанай гэрэл зураг
Байгша оной можо хоорондын «Баатар. Дангина» гэһэн мүрысөөндэ өөртэеэ танилсуулһан эрхим текстын авторта тусхай шан байгуулагдаа. Тиихэдэ харагшад һайхашаагдаһан хүнэйнгөө түлөө һунгажа, харагшадай тусхай шан барюулагдаха юм.
Буряад хэлэтэй, ямаршье яһанай хүн мүрысөөндэ хабаадаха аргатай. Тиихэдэ мүрысөөнэй шухала эрилтэ хадаа хабаадагшад нютаг хэлээрээ дуугарха, наһанай, угайнгаа илгаагаар буряад хубсаһаяа үмдэхэ ёһотой юм.
