1332
Ороһон Гахай жэлэй хүндэлэлдэ зорюулагдаhан Сагаан hарын ехэ найр бимба гарагта Камчатка можын буряадуудай "Байгал" эблэл эмхидхэн үнгэргэбэ.
Аяар 1995 онhоо үнгэргэгдэдэг энэ заншалта найр мүнөө жэл бүри ехэ дэмбэрэлтэйгээр үнгэрөө гэжэ онсолоё. Тайзан дээрэ Буряад ороноймнай гурбан үнгэтэ алтан соёмботой туг, алда Аюуша хадагаар нэмэреэтэй буряад эхэнэрэй дүрсэ гэрэлтэн туяарһан шэмэгүүдээр гоёолгоотой. "Сагаар hараар! Сагаалганаар!"гэжэ мүнгэтэн уряа холоhоо харагдана.
Бурханай дэлгээтэй тахилhаа бойпууртай санзайгаар танхим соо hууhан зониие утажа арюудхабад. Удаань "История бурятов Камчатки" гэжэ видео харуулагдаа. Заншалта буряад хубсаһаяа үмдэһэн Баир Гармаев, Саран Мункуева хоёр найр наадаяа тордиһогүй һайнаар хүтэлбэрилбэ.
Энэ үдэшэ уян нугархай хатар, уяруулма уран шүлэг, шог ёгто наадан, шэнхинээтэ дуу хүгжэм зэдэлжэ, харагшадай зүрхэ сэдьхэл буляаһан байна. Теэд ямар найр наадан ёохоргүй үнгэрхэб, хүгшэн залуугүй гар гараа барилсан ёохорой дүхэригтэ орожо, олоной һонирхол татаа.
"Байгал" эблэлэй түрүүлэгшэ Валерий Семёнович Галсанов, тэрэнэй нүхэр Светлана Гатаповна, Наталья Гавриловна, Дарима Жамсарановна, Туяна Буянтоевна гэгшэд Камчаткада ажаһуудаг буряадуудай урдаа хараха зон гээд тэмдэглэлтэй. Тэдэнэр найр наадаяаа шадамар бэрхээр эмхидхэһэн байна. Тиихэдэ Сагаалганай һайндэртэ олон яһатанай түлөөлэгшэд уригдаа һэн, тэдэнэр буряад арад Сагаан һарын һайндэрөөр амаршалжа, хэмжээ ябуулга эмхидхэгшэдтэ баглаа сэсэгүүдые барюулаа.
Энэ үдэшэ тайзан дээрэ буряад хубсаhанай дефиле-харалга эмхидхэгдээ. Удаань лотерей наадан эхилжэ, гол шан - үнэтэ смартфон Вилючинск хотын Ольга Александрова эзэеэ олоо.
Буряадаараа хубсалаад ерэhэн зондо, үндэһэн хубсаһаяа дууряаһан мүнөөнэй хубсаһаүмдэһэн уладта гарай бэлэгүүд барюулагдаа. Багашуулай дунда Айдар Данзанов гансаараа буряад дэгэлтэй байжа, урмашуулгын шанда хүртэжэ баярлаа. Дахин Сагаалгандаа буряадаараа хубсалаял даа гэжэ Дарима Жамсарановна зоноо уряалаа.
Эльмира Галеусовагай гэрэл зураг
Зоя ЦЫДЕМПИЛОВА, Камчатка можо
