​Улаан-Үдэдэ “Баатар-Дангина-2019” урилдаанай лауреадууд тодороо

Февралиин 27-до Н.Бестужевай нэрэмжэтэ гүрэнэй ород драмын театрай тайзан дээрэ заншалта болоһон “Баатар-Дангина-2019” гэһэн урилдаан үргэн дэлисэтэйгээр үнгэрбэ.

Бага балшар наһанһаа хойшо үхибүүдые буряад хэлэеэ, ёһо гуримаа, заншалаа сахин хүгжөөхэ, тордиһогүй буряад хэлэтэй, бэлиг талаантай эдиршүүлые, залуушуулые элирүүлхэ гэһэн зорилготой урилдаан олоной һонирхол түрүүлһээр. Байгша оной мүрысөөнэй дүримдэ хубилалтанууд оруулагдаа. Тиигэжэ “Уран бэлиг” гэһэн даабарида хабаадагшад ямаршье жанрта бэлиг талаангаа харуулха аргатай болоо. Тэрээнһээ гадуур, “Тусхай мүрысөөн” гэһэн даабарида милаанда, сэрэгэй албанда мордоходо, хурим түрэдэ, шэнэ гэртэ ороходо, ойн баярта зорюулһан үреэлэй һайхан үгэнүүдые хэлэбэ. Энэ даабари хабаадагшад эрхимээр дүүргээ гэжэ тэмдэглэлтэй.

Байгша жэлэй “Баатар-Дангина-2019” урилдаанда бэлиг талаантай 62 хүн хабаадаа. “Эдир Дангина” гэһэн номинацида 32 басагадай дундаһаа – 5-иинь, “Эдир Баатар” номинацида 16 хабаадагшаһаа – 4-иинь “Дангина” номинацида 9 хабаадагшаһаа – 5-иинь, “Баатар” номинацида 6 хабаадагшадһаа 4-иинь лэ түгэсхэлэй шатада мүрысэбэ.

Урилдаанда хабаадагшад бүгэдэ уран гоёор хөөрэжэ, ирагуу һайханаар дуулажа, бэеынгээ нугархайе харуулжа, бэлиг талаангаа гэршэлээ. Ургажа ябаа улаан бургааһадай тордиһогүй буряад хэлэн дээрээ шог зугаа, уг унгияа түүрээн хөөрэхэдэнь, харагшад замхашагүй халуун альга ташалгаар угтан абаа.

Буряадай үндэһэтэнэй нэгэдэхи лицей-интернадай һурагша Дмитрий Доксомов “Эдир Баатар” номинацида, Хяагта аймагай Алтайн дунда һургуулииин һурагша Номина Рампилова “Эдир Дангина” номинацида, Буряадай үндэһэтэнэй нэгэдэхи лицей-интернадай һурагша Уян Дашинбимб “Дангина” номинацида, Түнхэн аймагай Торын дунда һургуулиин Амгалан Янданов “Баатар” номинацида урилдаанай лауреадууд болоо.

Илагшадта Буряад Уласай Соёлой яаманай, арадай уран бүтээлэй улас түрын түбэй мүнгэн шангууд болон эбээн тэдхэгшэдэй үнэтэ бэлэгүүд барюулагдаа.

- Буряадаймнай хүбүүд басагад бэрхэнүүд. Байгша оной урилдаанда Эдир Баатар, Дангина, Баатар, Дангинанууд хэлэндээ бэрхэнүүд. Мүн лэ буряад хэлэ бэшэгэй багшанарынь үхибүүдээ ехэ бэрхээр бэлдэнэ. Жюриин гэшүүд тус мүрысөө гурбан можодо ээлжээлээд эмхидхэе гэжэ хөөрэлдэнэбди. Энэ һанамжыемнай Буряад соёлой яаман дэмжэхэ гэжэ найдагдана. Минии һанахада, можо можооороо бэе бэедээ ябажа энэ хэмжээ ябуулга үнгэргөө һаамнай, үхибүүдшье дүтэ харилсаатай, уран бэлигшье үргэдхэгдэжэ, үшөөшье һонин болохо бшуу,- гэжэ жюриин түрүүлэгшэ Зоригто Тогочиев онсолбо.

Буряад уласай соёлой яаман элдин нютагайнгаа бэлигтэй хүбүүд, басагадай дундаһаа ерээдүйн ододые элирүүлхэ гэһэн зорилготой мүрысөө эмхидхэн байгуулаа. Арадай уран бүтээлэй улас түрын түб дээдэ хэмжээндэ урилдаа эмхидхэһэн байна гээд тэмдэглэлтэй.

Арадай уран бүтээлэй улас түрын түбэй гэрэл зураг