Театрай жэлэй бэлгэ тэмдэг Буряад Уласта дамжуулагдана
Эдэ үдэрнүүдтэ Буряад Уласай хүүхэлдэйн “Үльгэр” театр Новосибирск хотодо зүжэгүүдые дэлгэнэ.
Энэ хэрэг Россида гүрэнүүдэй театрнуудай марафон эмхидхэһэнэй ашаар бэелүүлэгдэбэ. Сибириин дэбисхэр дээрэ “Үльгэр” театр ганса Буряад Уласаа бэшэ, мүн Алас Дурнын федеральна тойрогые түлөөлжэ, театрай жэлэй һүлдэ тэмдэг дамжуулба.
Театрай жэлдэ дашарамдуулан, Бүхэроссиин театральна марафон Владивосток хотодо февралиин 18-да эхиеэ абаа бэлэй. Тэрээндэ бүхы театрнуудай захиралнууд сугларжа, театрай жэл нээгээ.
Бүхэроссиин театрнуудай хабаадалгатай энэ түсэлэй ёһоор, байгша 2019 оной хугасаада марафон Ородой Холбоото Уласай 85 можо газарнуудаар үнгэрхэ юм. Мүнөөдэрэй байдалаар, Хабаровск, Урда-Сахалинск, Петропавловск-Камчатский, Биробиджан, Благовещенск, Магадан, Анадырь, Якутск, Шэтэ, Улаан-Үдэ гэжэ хотонуудаар театральна эстафетэ ябуулагдажа, Соёлой жэлэй һүлдэ тэмдэг бүхы гүрэн дотор гастрольнуудаар дамжуулагдаад байна.
Февралиин 20-до Үбэр Байгалай “Тридевятое царство” гэһэн театр Улаан-Үдэ зорижо ерээд, Театрай жэлэй тэмдэг дамжуулаад, гурбан үдэрэй туршада зүжэгүүдээ харуулба. Түрүүшын үдэр Буряад орон руу хүрэжэ ерэһэн театральна марафониие угтабад. Буряад драмын театр соо соёлой сайд Соёлма Дагаева болон Буряад драмын театрай уран һайханай талые даагша Саян Жамбалов хоёр һүлдэ тэмдэг дамжуулһан үбэр байгалайхидые баярай үгөөр угтаба.
- Бүхы гүрэнэй театрнуудай гартаа бариха энэ һүлдэ тэмдэг абаха талаантай байһандаа баяртайбди. Энэ һүлдэ манай “Үльгэр” театр саашань абаашажа, Новосибирскын театр руу дамжуулха. Юундэ “Үльгэр” бэ? Юундэб гэхэдэ, “Үльгэр” хадаа хүүгэдэй театр юм. Хүүгэд гээшэ манай ерээдүй ха юм даа. Хоёрдохёор, “Үльгэр” дүрбэ дахин “Алтан баг” шанда хүртэһэн габьяатай. Энэ театральна хаһада дахин тус шанда хабаадаха мэдүүлгэ баряад байнабди. Нёдондо “Руслан и Людмила” гэһэн зүжэгынь Дмитрий Медведевэй баталамжатай Гүрэнэй шанда хүртөө бэлэй. Тиигэжэ ород арадай классигуудай гаршагта эгээл эрхим зүжэг гэжэ тодороод, 3 сая түхэригэй шан абаа, - гэжэ Соёлма Дагаева мэдээсэбэ. Тэрэшэлэн “Үльгэр” театрай уран һайханай найруулагша Эрдэни Жалцанов ганса Буряад Уласые бэшэ, бүхы Алас Дурные түлөөлхэ эрхэдэ хүртэбэ гэжэ мэдүүлбэ.
- “Үльгэр” театр гурбан зүжэгүүдээ тиишэнь абаашаха. Тэндэхи харагшад манай театрай шэнэ шэглэл, шэнэ арга боломжонуудыемнай үзэг лэ даа. Гүрэн дотор мэдээжэ уран найруулагшадай табиһан зүжэгүүдые, жэшээнь, Яна Тумина “Алтан багта” хүртэгшэ гурбан зүжэгүүдэй нэгыень манай театрта табиһан. Февралиин 27-до Новосибирскын театрта Соёлой жэлэй һүлдэ тэмдэг дамжуулхабди, - гэжэ Эрдэни Жалцанов хөөрэбэ.
Һүлдэ тэмдэгэй нэгэ таладань харагшадай һууринууд ёһотой Урда сагай Грециин амфитеатрнууд мэтэ, нүгөө таладань марафондо хабаадагша хотонуудай гербнүүд һиилээтэй. Энэ тэмдэг Ородой арадай уран зурааша Андрей Ковальчук бүтээгээ.
Театрай жэлдэ зорюулагдажа эмхидхэһэн тус марафон хадаа хабаадагша театрнуудта гурбан үдэрэй туршада зүжэгүүдээ ондоо газар руу абаашажа харуулха арга олгуулна. Харгын, зүжэгшэдэй байра, хоол гэхэ мэтэ гаргаша хаана. Мүнөө сагта багахан хотонуудай театрнууд энэ талаар бэрхэшээлтэйл ха юм даа. Үбэр Байгалай хүүхэлдэйн театр Бүхэроссиин театральна марафондо хабаадаха аргатай болоһондоо баяртай. Театрай захирал Александр Мусиенкын хэлэһээр, Театрай жэл хадаа театральна шэглэлэй хүгжэлтэдэ ехэхэн түлхисэ болохо ёһотой.
- “Хүүгэд гээшэ манай ерээдүй” гэжэ хэлэдэг. Тиимэл хадаа хүүгэдтэ туһалха, дэмжэхэ ёһотойбди. Хүүхэлдэйн театрнууд хүнэй саашанхи хүгжэлтэдэ тон ехэ нүлөө үгэдэг. Үхибүүнэй эгээл түрүүшын алхамуудта хүүхэлдэйн театр ушаржа, һайхан соёлой шэглэлтэй танилсуулдаг. Саашадаа үхибүүн томо боложо, эдиршүүлэй театрта ябадаг. Эдэ театрнуудые үзэнгүй, харангүй байгаад, гуша наһа хүрэхэдөө, гэнтэ оперно театрта дурлашаха бэшэ ха юм даа. Тиимэһээ шата шатаар, аргааханаар үхибүүдые театрта дурлуулнабди. Энэ хэрэгтэ бидэнэй, хүүхэлдэйн театрнуудай, үүргэ ехэ, - гэжэ тэрэ тэмдэглэбэ.
Үбэр Байгалай хүүхэлдэйн театр 1935 ондо нүүдэл театрай түхэлтэйгөөр бии болоһон байна. 47 жэлэй туршада өөрын байрагүй, эндэ тэндэ зүжэгүүдээ бэлдэжэ дэлгэдэг байгаа. 1982 ондо Шэтэ хотын соёлой хуушан байшан тус театрта дамжуулагдаа. Гэбэшье мүнөө сагта театрай байшан һэльбэн шэнэлэгдэхээр болонхой. Ганса Шэтыншье театр бэшэ, манайшье болон бусад хотонуудайшье театрнууд баһал өөрын бэрхэшээлнүүдтэй бшуу. Тиимэһээ 2019 он Театрнуудай жэл гэжэ баталагдаһан хадаа театрнууд гүрэнэй талаһаа ехэхэн мүнгэн дэмжэлтэ хүлеэнэ.
Театральна марафон эмхидхэгдэжэ, ганса гастрольнууд бэшэ, театрнуудай газар можонуудай хоорондохи харилсаан, дүй дүршэлөөрөө хубаалдаан болоно. Хабаадагша хотонуудта артистнартай, найруулагшануудтай уулзалганууд, үзэсхэлэнүүд, дүршэлтэ хэшээлнүүд эмхидхэгдэнэ. Тиигэжэ театрһаа театр руу, хотоһоо хото руу, бүхы гүрэн дотор гэнжэ мэтээр дамжуулагдажа, театральна марафон Калининград хотодо 2019 оной түгэсхэлдэ хүрэжэ ерэхэ юм.
Анна Огороднигой гэрэл зурагууд