886
«Алтан бүргэд» гэжэ уран бэлигтэнэй уласхоорондын урилдаанда буряад хүгжэмөө тогложо, түрүү һууринуудые эзэлһэн Захааминай Санагын уралигай һургуулиин бэлигтэйшүүл бусажа ерээ.
Уласхоорондын энэ ехэ урилдаанда Узбекистанай, Казахстанай, Грузиин, Латвиин, Белоруссиин болон бусадшье хариин оронуудһаа, Ородой Холбоото Уласай ехэ-ехэ хотонууд ба можо нютагуудһаа уран бэлигтэйшүүл хабаадана.
- Санагын дунда һургуулида һурадаг 250 гаран һурагшадай уран бэлигтэй 97-ниинь хүүгэдэй уралигай һургуулида ябадаг. 1965 ондо байгуулагдаһан һургуулидамнай үхибүүд буряад арадай хүгжэмэй зэмсэгүүдээр наадажа, дуулажа, хатаржа, уранаар зуража һуранад. Хамтадаа 11 багшанар энэ һургуулида хүдэлнэбди, - гэжэ арадай хүгжэмэй багша Людмила Норбоева хөөрэнэ.
Уралигай энэ һургуули дүүргэһэшүүл Буряадайнгаа хүгжэмэй, дуу хатарай бүлгэмүүдтэ, һургуулинуудта амжалта түгэс хүдэлнэд. Энэл һургуули дүүргэһэн бэлигтэйшүүл багшална.
Шабинараа холо ойгуур ябуулжа, элдэбын урилдаануудта хабаадуулжа, дүршэлыень мүлихэ гэжэ багшанар ехэтэ оролдоно. Буряад оронһоо гадуур, Монгол орондо бэлигээ гэршэлээ. 2011 ондо Новосибирск хото ошожо ерээ. 2017 ондо тэрэл Санкт-Петербург хотодо үнгэрһэн уласхоорондын ехэ нааданда баһал амжалтатай хабаадажа ерээ бэлэй.
Басагадай “Сэдьхэлэй аялга”, буряад арадай хүгжэмэй зэмсэгүүдэй “Аялга” бүлгэмүүд 1-дэхи шатын, хатарай “Үлзы” бүлгэм 3-дахи шатын кубогуудта, дипломуудта хүртөө. Хүгжэм наадалгаар Арина Бандеева Сарюна Соктоева хоёр эрхимлээ. Уран зурагаар Сарана Доржиева, Арина Норбоева, Инна Нимаева, Норжима Цыренова гэгшэд эрхим амжалтануудые туйлаа. Хамта дээрээ 9 кубок, I, II, III шатануудай олон тоото дипломууд үхибүүдэй бэлиг шадабариие гэршэлнэ.
Энэ удаа дэлхэйн баруун хойто заха хүрэтэр ошоод, нютагайнгаа нэрые үргэжэ ерэһэн үхибүүдэй багшанарые нэрлэе: Татьяна Норбоева, Баярма Будаева, Инна Нимаева, Баярма Бабалаева, Людмила Норбоева, Сэсэгма Бабалаева, Намжилма Цыбенова.
Олон үхибүүдэй холо дайдаар амжалтатай ябажа ерэхэ хэрэг гаргаша ехэтэй гэжэ мэдээжэ. Эндэ бүгэдөөрөө нютагай зон, түрэлхид оролсожо, һаадгүй ябаад ерэхэ арга олгогдоо.
- Үшөө Санагымнай дасанай ламанар, аймагай соёлой таһаг, хүдөө ажахын управлени, редакци, Закаменскда ажалладаг Алдар Норбоев, Оюна Хартаева, нютагаймнай сомон дарга Лубсан Гончиков болон хубиин хэрэг эрхилэгшэд ехэ туһа хүргөө, - гэжэ Сэсэгма Дмитриевна баяраа мэдүүлнэ.
Үхибүүдшье, багшанаршье ганса амжалтануудаараа баясанагүй, мүн баһа Ородой Холбоото Уласай соёлой ниислэл Санкт-Петербургаар экскурсида ябаһандаа, ехэ һайхан буудалда байһандаа, һонирхолтой дүхэриг шэрээнүүдтэ, мастер-классуудта хабаадаһандаа ехэл баяртайнууд. Мүн тиихэдэ Москвада олон нютагаархиднай угтажа, амжалта хүсөө. Санкт-Петербургда нютагаархиднай олоороо ерэжэ, тоглолтыемнай хаража, маанадые дэмжэһэндэнь ехэ баяртайбди гэжэ хөөрэнэд.
Уран бэлигээ хүсэд дүүрэнээр гэршэлһэн санагаархин октябриин 23-26-ай үдэрнүүдтэ Сочи хотодо үнгэрхэ Уласхоорондын “Бэлигтэйшүүлэй долоон үнгын һолонго” урилдаанда уригдаа.
Сэнгэ Ринчинов
