696
Буряад хэлэ заадаг, монгол бэшэг үзүүлдэг, хуушан монголоор уран наринаар бэшүүлдэг, буряад арадай хатар, дуунуудта болон хүгжэмэй зэмсэгүүдышье дархалуулжа, арадай хубсаһа оюулдаг, бэшэшье урлалда һургадаг “Буряад Соёл” ниитэ бүлгэм тухай сониндоо нэгэнтэ бэшэ толилжол байдагбди. Энэ эблэл саг сагтаа элдэбын һонирхолтой уулзалгануудые үнгэргэжэ байдаг.
Энэ удаа апрелиин 5-да “Зугааша” суглаагаа Лев Бардамовай музей-галерейдэ үнгэргэбэ.
Буряад Уласай тамирай эмхиин түрүүлэгшэ, «Хэшэгтэн» гэжэ hургуулиин hоригшо Сергей Тулуев эртэ урдын буряад-монгол дайшалхы тулалдаашад тухай һонин хөөрөө дэлгээ. Сергей Юрьевич һургуулидаа хутагатай ба гар тулалдаануудта һургана. Урда сагта һэлмэ жада ханхинуулангүй, улаан гараараа тэмсэхэ гээшые ехэ дээрэ бододог байгаа гэжэ тэрэ хөөрэнэ. Тиимэ сэрэгшэдэй хэзээ байгуулагдаһаниие хэн тон тодорхойлхоб даа. Харин торгон сэрэг – хэшэгтэнээ Чингис-Богдо хаан өөрын зарлигаар эгээл эрхим сэрэгшэдһээ эмхидхэжэ, захагүй ехэ эрхэ олгоһон гэжэ мэдээжэ.
Морин хуурай шэдитэ аялга
Мэдээжэ хүгжэмшэн, морин хуурай мэргэжэлтэ багша, элдэб олон шангуудай лауреат Эрдэм Дымбрылов буряад арадай хүгжэм, арадай хүгжэмэй зэмсэгүүд тухай уран хөөрөөгөөрөө бултаниие һонирхуулаа. Морин хуур тухай домогуудые мэдэхэ хүнүүдшье Эрэм Биликтоевичай хөөрөөе ханамжатайгаар шагнаа.
Энэ бэлигтэй хүгжэмшэнэй уян сэдьхэлhээ гаргаhан ирагуу хүгжэм шагнажа, уулзалгада ерэһэн зон булта сэдьхэлээ хужарлаа.
Иимэ һонирхолтой уулзалганууд арадайнгаа түүхые, үндэһэн соёлые гүнзэгыгөөр ойлгохо хэрэгтэ ехэтэ нүлөөлнэ. Тиихэдэ ямаршье эритэ мэсэтые, буу шуу хэрэглэнгүй, улаан гараараа өөрынгөөшье бэе, хажуудахи зоноошье хамгаалжа, харатан дайсанаа даража шадаха гээшэ юун гээшэб! Тиигээдшье, хара багаһаа бэеэ һориһон хүн хододоо шуран солбон, элүүр энхэ ябаха ха юм.
Сэнгэ РИНЧИНОВ
