825
«Мүнгэн хонхонууд» гэжэ хүүгэдэй дуунай студиин гэшүүн Алтана Будаева үнгэрһэн жэлэй зун Шэнэхээнтэй танилсаһанаа ниитэлүүлбэ.
Шэнэхээндэ бүхы гэрнүүд бэе бэеhээ холо зайда байна. Айлнуудай хорёо хашаань ехэл. Хитад орондо газарынь бага гэжэ дууладаг тула, бидэ ехэтэ гайхаабди.
Намуухан багшын гэртэ байрлаабди. Тэндэ багшаяа “багш” гээд нэрлэнэ. Һэеы гэртэнь эдеэлэгшэ һэмди. Намуухан багшын эжы угаа амтатай эдеэ бидэндэ шанаа.
Хүүгэдэй наададаг газар халтирдаг модон хадануудтай ба дүүжэн-даажануудтай лэ. Хажуудань үшөө тайзан бии.
Хаанаһаабта?
Үглөөдэрынь Обоодо ошообди. Бүхы хүнүүд бидэнтэй зурагуудаа абхуулаа: баргажан дэгэлыемнай ехэ гоёшоогоо. “Хаанаhаабта?” - гэжэ олон зон асуугаа.
Хада дээрэ томо бургааhанууд ургаа. Хонид, морид, үхэр, тэмээн ябана. Буханууд сэргэдэ уяатай зогсоно.
Тэндэ хүгшэн залуугүй мотоциклаар гүйлгэлдэнэ, тэрэнээ «мотор» гэжэ нэрлэнэ. Бүгэдэ зон буряадаараа хөөрэлдэнэ.
Нютагай найрта олон дуушад, хатаршад оролсоо. Тайзанай хоёр талаhаа байһан hэеы гэрнүүд соо тэдэн хубсаhаа hэлгээ.
Үдэшэ тээхэнэ бидэ Шэнэхээнэй үхибүүдтэй концерт үгөөбди. Буряадаар, монголоор тэдэ хөөрэлдэнэ. Бүлгэм дотор долоон хүбүүд, бэшэнүүдынь - басагад. Тэдэнтэй хөөрэлдэхэдэ, ехэ хүндэ байгаа. Харилсахадамнай аба эжынэрнай хамhалсаа.
Тоглолтын нэгэдэхи номероор бултадаа «Эб найрамдалай дуу» дуулаабди. Юундэб гэхэдэ, бидэ энэ дуундаа клип бэшэхэеэ Шэнэхээн ошоһон байгаабди. Бэшэ дуунуудые hэлгэлдээд дуулаабди.
Концертын hүүлээр түүдэг носоогдоо. Дүгжүүбэ шэнги ехэ түүдэг тойрон, дискотекэ болоо. Удаань салют табяа. Залуушуул Алихан Дзе шагнаха дуратай. Тэрэнэй дуунуудые сээжээр мэдэнэ.
Шэнэхээнэй үхибүүд ехэ hонин нэрэтэй байна: Малина, Намуухан, Аруужан, Айраг, Адис, Ангир, Тэмүүлэн, Ута насан, Чингэнэм, Дандар, Түгэлдэр, Урлиг, Одонгэрэл, Долгоржаб, Зула, Зулгы, Баялиг...
“Эгшиг долоонтой” клип буулгаабди
Удаадахи үдэртэ бидэ съёмкодо хорин машинаар ошообди. Ехэ муу уларил тудаа: бороо ороо, hалхин ехээр үлеэгээ. Нютагай үхибүүд субатай байжа, ядалдаагүй. Бидэ ехэ даараабди.
Манай съёмко үзэсхэлэн һайхан газарнуудта үнгэрөө. Шэнэхээнэй «Эгшиг долоон» гэжэ бүлгэмтэй съёмко хээбди. Бидэ съёмкодо һуранхайбди. Шэнэхээнэй үхибүүдэй аба эжынэр, багшанар ехэ һанаата болоо. Гэбэшье тэдэн hайнаар буулгуулаа.
Нүгөөдэртэнь бидэ «HuluunBuir» гэжэ бэшээтэй газарта ябаабди. Тэндэ бидэ «Цепи кованые» гэжэ наада наадаабди. Энэ наадамнай баhал клип соо ороо. Тиигээд Шэнэхээнтэй хахасаха сагнай тулажа ерээ. Бидэ ехэ гуниглаабди. Зарим басагад уйлаа.
Алтана Будаева,
Улаан-Үдын 49-дэхи һургуулиин 7-дохи ангиин һурагша
