​Буряад театр - Агада

Хоца Намсараевай нэрэмжэтэ Буряадай гүрэнэй драматическа театр Агада, Могойтодо, Дулдаргада, Согто-Хангилда, Догойдо апрелиин 16-һаа 20 болотор зүжэгүүдээ, концерт-наадаяа харуулба.

Табан үдэрэй туршада театрта дуратайшуул жаргабабди. Түрүүшын үдэр “Bacaganэтигээрэй” зүжэг харахадамнай, энеэдэтэй, гунигтай, хайратай, бодолгото боломоор байгаа. Хүнэй сэдьхэлэй хүбшэргэй дайража, бидэндэ хайра дуранай, һэшхэлэй мэдэрэл түрүүлжэ, Буряад театраймнай артистнар шадамар бэрхэ, абьяас бэлигтэй гэжэ дахинаа ойлгобобди. "Амар сайн" түбтэ театрай артистнар "Оройтоһон дуранай охин" зүжэг апрелиин 17-до табяа. Билет дууһан худалдагданхай. Зүжэг хараха дуратай аад, оронгүй үлэһэн зон олон байгаа. Тиимэһээ энэ зүжэг апрелиин 19-дэ дахяад табиба. Энэ үдэр нэгэшье сүлөө һуури баһал үгы байгаа. Харагшад ямараар альгаа ташаа гээшэб!

Урда-агынхид тайзан дээрэ олоороо гаража, нютагайнгаа бэри болохо Лариса Ильинична Егоровагаа хүндэлэн ёһолбо, амаршалба. Буряад театрай ветеранууд Дарима Сангажаповае, Михаил Елбоновые, Марта Зориктуевае, залуу артистнарые ямар дуратайгаар хүлеэн угтааб даа!

Дулдаргада, Догойдо, Согто-Хангилда, Могойтодо харагшад халуун альга ташалгаар театрай артистнарые угтаа, баярай үгэнүүдые хэлэжэл байгаа.

Буряад театраймнай артистнар зүрхэнэймнай шэмшэртэр, сэдьхэлэймнай доһолтор, эльгэнэймнай эгшэтэр абьяас бэлигээ харуулаал!