​​Монгол туургата арадуудай аман зохёолой нааданда Буряадай эдиршүүл уригдана

Гэрэл зураг дээрэ: Фольклорно наада зохёон байгуулагшад - Монгол туургатанай үбэ соёлой сангай түрүүлэгшэ О. Лхагважав, Монгол туургатанай үбэ соёлой сангай гүйсэдхэхэ захирал С. Пэрэнлэй, Үбэр Монголой дуушан Анар Борхүү

Июлиин 22-23-да Улаан-Баатар хотодо Монгол туургата арадуудай хүүгэдэйфольклорно наадан болохо гэжэ Монгол туургатанай үбэ соёлой сангай түрүүлэгшэ О. Лхагважав дуулгаба. Тус нааданда Буряадһаа түлөөлэгшэд уригдана.

Арадай аман зохёолой иимэ наадан хоёрдохи удаагаа энэ жэл үнгэргэгдэхэ юм. Нёдондо түрүүшынь наадан ехэ амжалтатай үнгэрөө һэн. Монголой ба Үбэр Монголой 200 хүүгэд бэлиг шадабарияа харуулһан байна. Энэ жэлэй хэмжээ ябуулгада Буряад, Хальмаг, Тыва оронуудһаа хүүгэд оролсохоор болобо.

– Наадан болбол арадай аман зохёол, дуу, хатар бүжэг хүүгэдтэ зааха, хүүгэдэй абьяас шадабари хүгжөөхэ, хаа-хаанагүй ажаһуудаг монгол туургата арадуудай хоорондохи соёлой харилсаа холбоо хүгжөөхэ гэһэн зорилгонуудые урдаа табина. Нүүдэл һуудал байдалтай арад түмэнэй соёл уралиг агуу юм. Монголшууд ехэ газар дайда эзэлжэ һуудаг. Газар бүхэндэ өөрын гэһэн онсо соёл, ёһо заншал хадагалагданхай. Дэлхэйдэ таража һууһан монгол үндэһэтэнэй эхэ хэлэ, соёл уралиг, зан заншал олондо сурталшалха, харуулха хүсэлтэйбди, - гэжэ тус наада зохёон байгуулагша О. Лхагважав дарга хөөрэнэ.

Нааданда оролсогшо хүүгэд 6-11 наһанай, 12-18 наһанай гэһэн хоёр бүлэгтэ хубааржа хабаадаха юм. Тэдэнэр тус нааданда үльгэр, юрөөл, магтаал, оньһон ба жороо үгэнүүд, онтохон, домог түүрээхэ, мүн тиихэдэ уртын дуу, арадай дуу, хөөмэй, арадай хүгжэм, хатар бүжэг гүйсэдхэхэ.

Газар газарһаа бууһан айлшад амаралтын зуһалан-лагерьта байрлаха. Нааданай дүүрэһэнэй удаа, июлиин 24-25-да айлшаар бууһан хүүгэдтэ тусхай программа зохёогдонхой. Тэдэнэр Монголой түүхэтэ газарнуудаар аяншалжа, “Цагаан лавай» гэжэ фольклорно бүлгэмэй наада хаража, Тэрэлжэ паркын амаралтын газарта хонохо юм.

Тус наада эмхидхэн байгуулагшад: «Монгол туургатанай үбэ соёлой сан» ниитын эмхи, энэ түсэл дэмжэгшэд – Монгол Уласай Засагай газарай нэрэһээ Соёл уралигай газар, Улаан-Баатар хотын захиргаанай Хүүгэд, гэр бүлын хүгжэлэй газар, Уран бүтээлэй нэгэдэл “Соёмбо”. Буряад Уласай талаһаа Арадай уран бүтээлэй түб (РЦНТ) туһа хүргэхэ болоо. Тиимэһээ нааданай дүримтэй дүтөөр танилсаха гэбэл, РЦНТ-дэ хандажа болоно, мүн Фейсбук соо «Монгол Туургатны Урлаг» гэһэн нюур хуудаһан дээрэ нааданай дүрим үгтэнхэй.