​​«ЁОХОРОЙ ҺҮНИ» ОЙРТОБО

Һүүлэй арбан хоёр жэлэй туршада «Байгал» театрай үнгэргэжэ байһан тус ехэ нааданда заншалта ёһоороо Буряад ороноймнай, Ородой Холбооной можо нютагуудай болон хари гүрэнэйшье зохёохы бүлгэмүүд хабаадаха аргатай. Гадна «Буряад үнэн» Хэблэлэй байшанай хэдэн жэлэй туршада Сагаалганай үеэр эмхидхэжэ байһан «Бүхэдэлхэйн ёохор» гэһэн түсэлшье энэ удаа «Ёохорой һүнитэй» нэгэдүүлэгдэжэ, улам эршэ хүсэеэ нэмэбэ гэхэдэ, алдуугүй. Июниин 29-дэ Улаан-Үдэ хотын Дээдэ Онгостойдохи Этнографическа музейн дэбисхэр дээрэ заншалта ёһоороо хэдэн мянгаад хүн сугларжа, гар га­раа барилсан, мүр мүрөө түшэлсэн, ёохороо хатаран зугаалхань.

- Байгша оной ехэ нааданда алтан дэлхэйн алишье буланда ажаһууһан зон хабаадаха аргатай болобо. Бэеэрээ хүрэжэ ерээгүйшье һаа, Этнографическа музейдэ тод­хогдогдохо томо гэгшын дэлгэсэ дээрэ холын Нью-Йорк хотодо гү, Ага тойрогто гү, уласаймнай аймаг­та, хүдөө һууринда гү – хаанашье хатаржа байһан буряад-монгол зо­ноо хараха арга боломжотой бай­хабди, - гээд, «Буряад үнэн» Хэблэ­лэй байшанай захиралай орлогшо Александр Махачкеев онсолходоо, [email protected] гэһэн сахим хаягаар видео-бэшэлгэнүүдээ уридшалан эльгээхэ аргатайт гэжэ үргэн оло­ниитэдэ дуулгана.

Гадна «Ёохорой һүниин» зан­шалта урилдаанда хабаадаха бүлгэмүүдэй урда эмхидхэгшэдэй табиһан эрилтээр, бүридэлдэнь 30- һаа үсөөн хүн байха ёһогүй.

Жэнхэни ёһоорнь ёохорло­хо гээшэ бэлэн бэшэ. Дүхэриглэжэ, гар гараа барилсан хатархадаа, нэгэ жэгдээр алхаха, хүдэлхэ хэрэгтэй. Мүн үшөө нэгэ шухала зүйл гэхэдэ, ёохоройнгоо дуу зүбөөр аянгалан дуулаха ёһотой. Ёохорлохо ёһо гури­маа эбдэжэ хазагайруулангүйгөөр, ерээдүйнгөө үетэндэ дамжуулхын түлөө иимэ эрилтэнүүдые табинаб­ди, - гэжэ «Байгал» театрай мэргэ­жэлтэд ехэ нааданай дүримүүдые тайлбарилна.

Тус хэмжээ ябуулгада хабаа­даха бүлгэмүүд хоёр шэглэлээр мүрысэхэ: урданай заншалта ёохор болон шэнэ үеын шэнжэ оруулһан ёохор. Тиигэжэ эгээл эрхим гэжэ элирүүлэгдэһэн зохёохы бүлгэм 100 000 түхэригэй Гран-при шан­да хүртэхэ. Бүхыдөө «Байгал» те­атр 204 000 түхэригэй шангай жаса байгууланхай.

Хабаадаха гээ һаа, Улаан-Үдэ хото, Ербановай гудамжа, 6-дахи байшан гэһэн хаягаар 8-дахи таһалгада орожо, мэдүүлгэ үгэхэ аргатайт. Мүн theatre-baikal@ mail.ru сайт дээрэ мэдээсэл дурадхагданхай. Гадна 21-18-93, 21-23-99 утаһаар хонходожо, алибаа асуу­далнуудаа лаблажа болоно.