​​ЭТИГЭЛ ХАМБЫН НАМТАРААР

Июниин 29-30-ай үдэрнүүдтэ Ивалгын дасанда ээлжээтэ уласхоо­рондын эрдэмэй-практическа хуралдаан үнгэргэгдэхэнь. Тус хэм­жээ ябуулгын үедэ Алла Намсараевагай бэлдэһэн номтой танил­салга болохоор хараалагданхай.

Мүнөө үедэ Буддын шажантанай заншалта Сангхын хэблэлэй албан­да хүдэлдэг Алла Намсараева энэ но­моо Этигэл хамба ламада зорюулһан байна.

Даша-Доржо Этигэловэй намтартай үнинэй танилсаһамби. Хуби заяаниинь ганса намайе бэшэ, бүхы һүзэгтэниие мүнөө болотороо гайхуулһаар. Ном соо Этигэл хам­ба ламын намтар ехээр үгтэнэ. Юуб гэхэдэ, өөрөө Этигэл хамба урдахи 11 наһаяа дэлгэрэнгыгээр хөөрэһэн байдаг. Энэнь аргагүй һонирхолтой. Олоной һонорто түрүүшынхиеэ дурадхагдана гээшэ, - гэжэ автор хөөрэнэ.

Хэдэн жэлэй саада тээ Алла На­мсараева Москвагай телевидени­ин ажалшадтай Этигэл хамба лама тухай баримтата фильм буулгаа юм. Тиин бүтээлыень холо ойгуур кинофестивальнуудта олон тоото сугларагшад хараһан байна. Эгээл тэрэ үедөө Этигэл хамба лама тухай мэдээсэлнүүдые, саарһа дансануу­дые суглуулжа эхилээ. Мүнөө тэрэ баян нөөсэ дээрээ үндэһэлэн, номоо бэшээ. Дамба-Даржа Заяевай нэ­рэмжэтэ “Даша Чойнхорлинг” гэһэн Буддын шажанай дээдэ һургуулиин хүтэлбэрилэгшэд Дымбрыл багша Дашибалданов болон Жаргал багша Дугданов гэгшэд ном толилхо хэрэг­тэ хубитаяа оруулаа.

Дымбрыл багшын хэлэһээр, су­гларагшад номтой танилсахаһаа гадна баримтата фильм хараха. Бусад юумэн хуушаараа үнгэрхэ юм.

Эрдэмэй-практическа хурал­даанай үедэ буряад, ород болон мон­гол хэлэнүүд дээрэ ажал ябуулагдаха юм. Монголһоо олон айлшад манай хэмжээ ябуулгада ерэхээр хараалаг­дана, - гэжэ Дымбрыл багша хөөрэнэ.