Хойто эхынгээ аяг ааша шүүмжэлнэ
Мүнөө үеын буряад драматургиин замаар зүрхэтэйгөөр түрүүшын алхамуудые хэжэ ябаһан авторнуудай пьесэнүүдээр табигдаһан “Уялга” гэһэн шэнэ зүжэг июлиин 3-да харагшадта дурадхагдаба.
Найруулагша Александр Кудряшёв Буряад театрай зүжэгшэн Жажан Динганорбоевагай «Уялга» ба уран зохёолой таһагай мэргэжэлтэн Намжилма Цыденовагай «Хойто эхэ» гэһэн пьесэнүүдые нэгэдүүлжэ, зүжэг табиһан байна. Зураглагдаһан хоёр ажабайдал, хоёр хуби заяан хэды ондоошье һаа, адлирхуу. Энэ бүтээл хадаа «Шэнэ буряад зүжэг» гэһэн зохёохы лабораториин дүн болоно гээшэ.
Олон харагшад суглараа. Тэдэнэй дунда Москвагай хүндэтэ айлшан - эрэмдэг бэетэй буряад хүбүү үргэжэ абаһан Наталья Бурдина байгаа.
- Зүжэг харахаяа зорюута ерээб: буряад зоной ажабайдалтай танилсаха, хараа бодолыень ойлгохо, ёhо заншалнуудыень мэдэхэеэ һананаб. Зүжэг соо мүнөө үеын ажабайдал тааруугаар зураглагдана. Хүн бүхэнэй зүрхэ сэдьхэл доһолгоо. Зарим хэһэг харахадаа, би уяраадшье абааб, - гэжэ тэрэ һанамжаараа хубаалдаа.
Зүжэг соо буряад гэр бүлын ажабайдал, гэшүүдэйнь хоорондохи орёо харилсаан, буряад ёһо заршамууд тухай бодомжологдоно.
Мүнөө үеын буряад эхэнэр ямар бэ? Юун тухай һанажа, бодожо, эльгэлжэ ябанаб? Гэр бүлынгөө урда ямар уялгатайб, дүтынгөө хүнүүдэй жаргалай түлөө ямар сэн түлэхөөр бэлэн бэ? Уг үргэлжэлүүлхын түлөө үхибүүгээ үргэжэ үгэхын, олон хүүгэдтэй айлда хойто эхэ боложо орохын тула хэды шэнээн сэдьхэлэй хүсэн хэрэгтэйб?
Авторнууд эдэ асуудалнуудта харюу бэдэрнэ. Зүжэгэй тобшолол - буряад эхэнэр ямаршье бэрхэшээл дабажа гараха голтой, юундэшье диилдэхэгүй.
Түрэһэн үриеэ орхиһон дүүгээ аханьшье тама үзэнэ
Намжилма Цыденовагай тэмдэглэһээр, ехэ ажал хэгдээ. Тэдэ нэн түрүүн залуу драматургнуудай һургуули гараад, хахад жэл соо багшанарайнгаа хүтэлбэри доро зүжэгүүдээ бэшээ. Һүүлдэ олон харагшадые, найруулагшадые урижа, Буряад театрай тайзан дээрэ уншаа юм.
- Энэ минии түрүүшын туршалга хадаа, ехэл һанааем зобоогоо. Мүнөөдэр иимэ олоор ерэһэн харагшадтаа бидэ ехэ баярлаабди. Бидэниие хүндэлжэ, дэмжэхэеэ ерэһэндэнь, бэлэгүүдые барижа, дулааханаар угтаһандань, доро дохинобди, - гэжэ Намжилма Цыденова хэлээ.
“Уялга” зүжэг харахаяа ерэһэн Лубсама Дамбаева залуу драматургнуудай ажалда һайн сэгнэлтэ үгөө. Тэрэ “Буряад FM” радиогой викторинада хабаадажа, энэ зүжэгэй билет шүүһэн байна.
- Минии харахада, энэ зүжэг буряад арадай ёһо заншал тухай. Юундэб гэхэдэ, үхибүүгүй айлнууд түрэл гаралһаань үргэжэ абадаг. Буряад эхэнэр үхибүүгээ үгэхэдөө, ямар ехээр тулижа, зобожо ябадаг бэ гэжэ ойлгуулна. Ганса Буряад театрай бэшэ, харин Ородшье театрайнгаа hонирхолтой, гүнзэгы удхатай зүжэгүүдтэ ябажа байгыт, - гэжэ тэрэ уряалаа.
Үхибүүгээ ахадаа үргэжэ үгөөшье һаа, эхын сэдьхэл зобоно
Олон тоото харагшадай нэгэн Аюна Цыдендамбаева энэ зүжэг заабол харахые бултанда дурадхана. Тэрэнэй онсолһоор, hонирхожо харахаар найруулагданхай, мүн актёрнууд ехэ гоёор наадана. Хойто эхэ - Буряад Уласай габьяата зүжэгшэн Дарима Лубсанова хүнэй зүрхэ сэдьхэл дайража шадаа. Хөөрхэн, сэбэрхэн Людмила Тугутовагай нааданда баhал үндэр сэгнэлтэ үгөө.
- Буряад театрай актёрнуудта баяраа хүргэжэ, саашадаа маанадаа үшөө олон янзын удха шанартай зүжэгүүдээрээ hонирхуулжа, бүри олон харагшадтай болохыень хүсэнэб, - гэжэ Аюна Цыдендамбаева хэлээ.
“Уялга” зүжэг эхэнэрнүүдэй үүргэ, эхэ хүнэй уялга тухай бодомжолуулна, ерээдүйдэ эжы болохо басагадые багаһаань хойшо хүмүүжүүлхэ хэрэгтэй гэжэ ойлгуулна.
Анна Огороднигой гэрэл зурагууд