​​«Булаг» бурьялһаар...

Аймагай засаг даргын 1-дэхи орлогшо Ц.Жамсуев Эдуард Будаевта хадаг барина

Ухаан зүрхэнһөө

Үгэ үгөөр суглуулжа,

Сэдьхэлэй гүнһөө

Сэсэрэн гараһан мүрнүүднай

Уудам Буряадайм

Дуулим дайдаар жэргэжэ,

Булаг мэтэ

Бурьялжа, арюухан гургаһай!

Гушан гурбан Гулбай ехэ Яруу­нын уран зохёолой “Булаг” нэ­гэдэл 85 жэлэйнгээ ойе үргэн дэлисэтэйгээр угтаа. “Буряад үнэндэ”, “Байгал” сэтгүүлдэ, айма­гай “Ярууна” сониндо уран зохёол­нууд, “Булагай” эдэбхитэй гэшүүд тухай зураглалнууд, нэгэдэлэй түүхэшье олоор толилогдоо. Ай­магай Түбэй номой сан “Сэдьхэлэй уянганууд”, “Булагнай бурьялһаар” гэһэн үнгэтэ дэбтэрнүүдые болон аймагайнгаа тугай, гербын зура­гуудтай, Василий Байбородинай шүлэгтэй дэбтэр хэблэжэ гаргаа.

Ойн баярай зулайнь боложо, ию­лиин 5-да аймагай түб Нарһатада баярай хүгжэм дуута, уран зохёо­лой найр олоной хабаадалгатайгаар үнгэрөө.

Цыден Цырендоржиевай “Булаг” шүлэг зэдэлжэ, аймагай засаг дар­гын нэгэдэхи орлогшо Цокто Жам­суев, Нарһатын сомон дарга Этигэл Дондоков уран зохёолшодые, ирагуу найрагшадые болон уран зохёолдо дуратайшуулые халуунаар амаршал­жа, үшөөл үндэр амжалта хүсөө.

“Булаг” нэгэдэлые 27 жэлдэ удари­дажа ябаһан ирагуу найрагша, уран зохёолшо, сэтгүүлшэ Эдуард Будаев нэгэдэлэйнгээ түүхые тобшохоноор хөөрэжэ үгөө. Буряадай Уран зохё­олшодой холбооной байгуулагдаһан жэлдэ Жамьян Балданжабоной үүсхэлээр эмхидхэгдэһэн хадаа, баян түүхэтэй байнгүй яахаб. Нэгэдэлые байгуулһан, эхиндэнь байһан уран зохёолшодой аша габьяа үндэрөөр сэгнэгдэжэ, дайнай ветеран, “Улаан Одоной” кавалер Зугдыр Цыдыпов (мүнөө Нарһатын 1-дэхи һургуули нэрыень дээрэ үргэнэ) түрүүшын “Булаг” альманах гаргаа һэн гэжэ ду­лааханаар дурсагдаба. Сугларагшад бодожо, аха нүхэдэйнгөө нангин ду­расхаалые абяагүйгөөр ёһолоо.

Эдуард Дансаранович бултаниие амаршалхадаа, номой сангай ажалшадай ябуулдаг ажалые ехэ үндэрөөр сэгнэжэ, баяраа мэдүүлээ.

Сэдьхэлэй дулаахан үгэнүүдээр...

Эсэгын дайнай ветеран, Берли­ниие абалсаһан Нимбу Дорживай шүлэгүүдээр Владимир Дамбуевай зохёоһон дуунуудые “Улаан Ярууна” бүлгэм ирагуу гоёор гүйсэдхэжэ, сугларагшадые хужарлуулаа.

“Буряад үнэнэй” эрхилэгшэ Даши-Доржо Болотов “Үнэнэй” үнэн нүхэр Эдуард Дансарановичые, “Булагай” гэшүүдые, гэгээрэлэй ехэ ажал ябуул­жа байһан номой сангай ажалшадые халуунаар амаршалжа, хани барисаа­гаа улам үргэдхэхыень уряалаа.

“Ярууна” ансамбль, Даша-Нима Халхаровай болон Ешин-Хорло Жамбаловагай үгэнүүдээр зохёогдоһон Баир Хамаевай “Ярууна”, “Нютагайм наһатайшуул” дуунуудые, “Туяа” бүлгэм “Ярууна” болон “Үдын эхин”, “Анханай жаргалтай буряадби” дуу­нуудые зэдэлүүлэн хангюурдаа. Мүн баһа Василий Житихинэй “Село Со­сновое” дуун зэдэлээ.

“Ярууна” сониной эрхилэгшын орлогшо Цырен-Дыжит Сандакова, бэшэгүүдэй таһагые даагша Снежа­на Серебренникова, багшын ажалай, “Булагай” ветеран, Буряадай Уран зо­хёолшодой холбооной гэшүүн Полина Эрдынеева, уран зурааша, ирагуу най­рагша Владимир Банзаракцаев, Тамара Коновалова, Александра Байбороди­на, Вера Саганова, Светлана Дашиева, Ешин-Хорло Жамбалова ирагуу най­рагшад, хүгжэмшэн Баир Хамаев, но­мой сангай даагша Ирина Жалсанова гээд лэ, “Булагай” олон гэшүүд зүрхэнэй дулаахан үгэнүүдые хэлэжэ, ирагуу шүлэгүүдээ уншаа.

Булта гэшүүдтэ ойн баярай ме­дальнууд, аймагай захиргаанай Бая- рай бэшэгүүд барюулагдаа. Гурбан гэшүүдтэ “Буряадай Уран зохёолшо­дой холбооной гэшүүн” гэһэн үнэмшэлгэнүүд үгтөө.

Ярууна аймагай Залуушуулай болон тамирай таһагай гэрэл зураг