1339
Июлиин 23-да Ород драмын театрай танхим соо үнгэрһэн уласхоорондын хэмжээнэй “Гэгээн аласай одод” гэжэ урилдаанай һүүлшын шата харагшад сэдьхэлээ ханаан, эльгэ зүрхөө хүдэлгэн байгаа бэлэй. Үхибүүдые хабаадуулһан энэ урилдаан жэл бүри Монголдо, Үбэр Монголдо гү, али Буряад Уласта үнгэргэгдэдэг. Байгша ондо урилдаанай түгэсхэлэй шатые Буряадай тала даан абаба. Тиигэжэ Молор һайхан Монгол ороной, Үбэр Монголой, Ага тойрогой болон нютагаймнай соёл уралигта эльгэтэй эдиршүүл Улаан-Үдэдэ урилдаба.
Сэнхир дэлгэсээр сэхэ дамжуулагдаһан уласхоорондын ехэ нааданда гурбан теле-һубагууд оролсоо: «МИР-Бурятия» (Ородой Холбоон), «TV9» (Монгол), «NMTV-Одон Телевиз» (Хитадай Үбэр Монголой бэеэ дааһан аймаг).
Урилдаанай бүхы шатануудые “Мир-Бурятия” теле-һубагаар хараха арга боломжо байха. Энэнь баһал аргагүй сэнтэй, юундэб гэбэл, энэ хэмжээндэ ошожо шадаагүй зон гэртээ хаража, урилдаанда оролсоһон үхибүүдые таниха, мэдэхэ болохо.
Зүйтэй зүбшэлнүүд
Буряадай зүгһөө эстрадын мэдээжэ дуушан, уласаймнай габьяата зүжэгшэн Мэдэгма Доржиева, Монгол ороной габьяата зүжэгшэн Чулуун-Баатарын Насантогтох, «NMTV - Одон Телевиз» теле-һубагай гол продюсер Содбилэг гэгшэд үхибүүдэй бэлиг шадабари сэгнэһэн байна. Тиихэдээ саашадаа яагаад хүдэлхэб, дутуу дундануудаа яагаад заһахаб гэжэ хэлэжэ үгэхэһөө эхилээд, олон-олон тон хэрэгтэй зүбшэлнүүдые үгэһэн жюриин гэшүүд ехэ ажал хээ.
Монголой «ододые» хүсэмөөр бэшэ
Эгээл бэрхэеэ бодотоор гэршэлжэ шадаһан Монголой “Аялгуу” гэһэн хатарай бүлэг Гран-при шан абаа. Илагшадта мүнгэн бэлэг, медальнууд ба “Гэгээн аласай одод” гэһэн уран баримал барюулагдаа.
Монгол ороной Түмэн Эрдэнэ “хатар” гэһэн номинацида, Хитадай Үбэр Монголой Цацраа “дуун” гэһэн номинацида түрүүлээ. Монголой Оюунбаатарын Хүслэн мүнгэн медальда хүртэбэ.
Буряадай Улаан-Үдэ хотын “Уян бэлиг” гэһэн хатарай ансамбльда, Ага тойрогой Могойтын аймагай Сарюна Дондоковада гурбадахи һуури үгтөө.
Бусад хабаадагшадта бэлэгүүд, дипломууд барюулагдаа.
Евгений ВАХРУШЕВАЙ гэрэл зурагууд
