​​Буряад уласта Д.Аюшеевэй нэрэмжэтэ хүгжэмэй-гуманитарна лицейн байшан задалагдахань

Орондонь шэнэ гурбан дабхан байшан баригдажа, 2020 оной сентябрь соо ашаглалгада оруулагдахаар түсэблэгдэнэ. Энэ хэрэгтэ гүрэн түрын болон уласай һанһаа 198 сая түхэриг һомологдохо.

- Аяар 1932 ондо баригдаһан хуушан байшангыень задалха ажалнууд һаяын сагта эхилэгдэхэ. Тусхай шэнжэлгэ ябуулһанайнгаа дүнгөөр энэ байшан барилгын юрэнхы эрилтэнүүдые хангахагүй байхаһаа гадна, газарай хүдэлөө һаань, бутаржа унашахаар болоод байна, тиимэһээ саашадаа ашаглагдаха аргагүй гэжэ элирүүлээбди, - гэжэ «Улан-Удэстройзаказчик» гэһэн нютагай засагай эмхи зургаанай мэргэжэлтэд тэмдэглэнэ.

Барилгын хэгдэхэ үедэ зарим үхибүүд лицейнгээ 1-дэхи байшанда һураха, тэрэнь холо бэшэ оршодог юм. Гадна ойро тойронхи һургуулинуудаар таража, хэшээлдээ ябаха. Улаан-Үдын Захиргаанай соёлой хорооной мэдээсэһээр, болбосоролой тус эмхи зургаанда мянга гаран үхибүүд үглөөнэй 8 сагһаа үдэшын 20.30 болотор гурбан ээлжээгээр һурана.  

Буряад Уласай Соёлой яаманай мэдээсэлэй албанай гэрэл зураг