1269
Байгша долоон хоногто эхиеэ абаһан граффити зурагай үргэн дэлисэтэй фестиваль август һарын дүүрэтэр үргэлжэлхэ.
Энэ түсэлэй урда оршон үеын уралиг хүгжөөхэ, хотын үйлсэ гудамжануудые шэмэглэн гоёохоһоо гадна, Дотоодын хэрэгүүдэй яаманай Хуулиин наһа гүйсөөгүйшүүлэй хэрэгүүдэй талаар албанда бүридхэгдэһэн хүүгэдые хабаадуулжа, сүлөө сагыень ашаг үрэтэйгөөр үнгэргэхэ зорилгонууд табигдана гээд эмхидхэгшэдынь мэдүүлнэ.
Тус арга хэмжээндэ Ород гүрэнэй олон ондоо можо нютагуудһаа, мүн хүршэ Монгол оронһоо мэргэжэлтэ граффити-зураашад хүрэжэ ерэнхэй. Тодорхойлходо, Санкт-Петербург, Москва, Новосибирск, Красноярск, Эрхүү, Шэтэ, Владивосток, Улаан-Баатар, Улаан-Үдэ хотонуудай 30 гаран түлөөлэгшэд хабаадалсана.
- Июль соо Улаан-Үдэ хотын Захиргаанай хүтэлбэрилэгшын уялга дүүргэгшэ Игорь Шутенковтой уулзажа хөөрэлдэхэдөө, иимэ арга хэмжээ эмхидхэхэ тухай хэлсээ һэмди. Тэрэ али болохоор дэмжэлгэ үзүүлхэб гэжэ найдуулаа бэлэй, - гээд, энэ түсэл эмхидхэгшэ, Буряадай Аюултай спортын зүйлнүүдэй олониитын эмхиин түрүүлэгшэ Валентин Мокрий тэмдэглэнэ.
Тус фестиваль хоёр долоон хоног соо үргэлжэлжэ, хамта дээрээ 1000 гаран дүрбэлжэн метрэй талмай граффити-зурагуудаар шэмэглэгдэхэ гэжэ Улаан-Үдын мэриин хэблэлэй албан дуулгана.
Буряад Уласай Соёлой яаманай мэдээсэлэй албанай гэрэл зураг
