1095
Шэнэ хаһада харагшадайнгаа һонорто дурадхаха олон тоото түсэлнүүдэйнгээ тон һонирхолтой хэһэгүүдые «Байгал» театр тус тоглолтодоо суглуулжа харуулаа. «Монголнуудһаа могол хүрэтэр», «Show of dance», «Кино-уралигай юртэмсэ руу» гэһэн шоу-түсэлнүүдэй, мүн Дандар Бадлуевай зохёохы ажалда зорюулагдаһан тоглолтын болон бусад арга хэмжээнүүдэй багахан үзэгдэлнүүд тайзан дээрэ табигдажа, театрай шэнэ хаһын түсэбүүдые нээгээ бшуу.
Гадна Буряад орондо ба Эрхүү можодо ажаһуудаг Байгал шадарай буряадуудай дуунай урданай онсо маяг һэргээн хүгжөөхэ гэһэн зорилготой шэнэ түсэлһөө хэһэг дурадхагдаһаниинь һайшаалтай. Ород гүрэнэй арадуудай соёлой баялиг сахин һэргээхэ талаар Бүхэроссиин урилдаанда «Байгал» театрай илалта туйлаһанай ашаар энэ түсэл бэелүүлэгдэнэ. Гадна Санкт-Петербург хотын архивта 1913 ондо бэшэгдэһэн «Наян Наваа» гэжэ дуу театрай зохёохы мэргэжэлтэд олоо бшуу. Тэрэнииень дуушан Болдын Ганцэцэг тоглолто дээрэ гүйсэдхэжэ һонирхуулаа.
Эдэ бүгэдые һайхашааһан харагшад «Байгал» театрай ээлжээтэ тоглолтонуудые хүлеэнэ.
«Байгал» театрай мэдээсэлэй албанай гэрэл зураг
