1141
Сентябриин 5-һаа 11 болотор Эрхүү хотодо, А.Вампиловай нэрэмжэтэ Эдир харагшадай театрта болохо “Байгалай һахюуһан” гэһэн уласхоорондын ехэ нааданда “Үльгэр” театр оролсохонь. Энээн тухай театрай хэблэлэй албан дуулгана.
Дэлхэйн арадуудай уран зохёолой болон арадай аман үгын удхаар найруулагдаһан зүжэгүүдые Яхад Уласай, Эрхүү можын, Иваново хотын, мүн Монгол болон Солонгос гүрэнүүдэй театрнууд дурадхаха. Буряад Уласһаа “Үльгэрһөө” гадна Буряад драмын театр тус ехэ нааданда хабаадана.
“Үльгэр” театр Эрдэни Жалцановай найруулһан “СайнЭр” гэһэн зүжэгөө харуулха. Тэрэниие бүтээлгэдэ буряад арадай уртын дуу гүйсэдхэдэг Алдар Дашиев, хүгжэм найруулагша Галмандахын Баттулга, хүгжэмшэн Хэшэгто Бодиев, уран зураашад Ольга Акимова, Солбон Лыгденов гэгшэд хабаадалсаа.
“СайнЭр” гэжэ зүжэг сентябриин 9-дэ 11.00. ба 16.00. сагта Вампиловай нэрэмжэтэ Эдир харагшадай театрай тайзан дээрэ харуулагдаха.
Буряад Уласай соёлой яаманай мэдээсэлэй албанай гэрэл зураг
