1170
Августын 30-да Улаан-Үдэ хотодо, Намжил Нимбуевай нэрэмжэтэ гудамжада ирагуу найрагшадай урилдаан үнгэрхэ, харин онлайн-шатань эхилэнхэй. Эгээл тэрэнэй дүнгөөр түгэсхэлэй шатада гараха уран бэлигтэнэй нэрэнүүд элирхэ.
Урилдаанда хабаадагшадта сэдэбэй үгтэхэдэнь, тэрэ дороо богонихон хэмжээнэй шүлэгүүдые зохёохо зэргэтэй. Зүүн зүгэй уран зохёолой заншалаар, жэншэдгүй хэлбэритэй мүртөө удхань хүсэд гаргаагдаагүй бүтээлнүүд лэ эрхим гэжэ тоологдохо. Гадна шүлэгэй удха шанар, байгуулга, дүрэнүүд, бэлгэ тэмдэгүүд, мүн ирагуу найрагшын хандаса, онсо абьяас сэгнэгдэхэ гээд, урилдаа эмхидхэгшэд мэдүүлнэ.
Тэдэнэй тэмдэглэһээр, 2019 оной урилдаанай гол шан – хилэнэй дальбараагай баримал – Буряад орон руу “ниидэжэ” ерэнхэй. Гадна түрүүшын гурбан шатын лауреадууд тусхай үргэмжэлэлдэ болон үнэтэ шангуудта хүртэхэ.
Буряад уласай соёлой яаманай мэдээсэлэй албанай гэрэл зураг
