1798
Буряад Уласай соёлой яаманай мэдээсэлэй албанай гэрэл зураг
Августын 22-һоо 24 болотор Улаан-Баатар хотодо “Дэлхэйн номой сангуудай монгол гар бэшэмэлнүүдэй суглуулбари ба тэдэниие шэнжэлгэ” гэһэн уласхоорондын хуралдаан үнгэрөө. Тэндэ Үндэһэнэй номой сангай Библиографиин ба хизаар ороноо шэнжэлэлгын түбэй ахамад мэргэжэлтэн Норжима Лубсанова хабаадаа. “Буряад Уласай Үндэһэнэй номой сангай жасада хадагалагдажа байһан хуушан монгол хэблэлнүүд” гэһэн элидхэл соогоо XIX зуун жэлэй хоёрдохи хахадһаа XX зуун жэлэй 20-30-аад онууд болотор бэшэгдэһэн номууд тухай мэдээсэл тэрэ дурадхаа. Гадна XVI-XVIII зуун жэлнүүдэй түүхын болон соёлой үнэтэ мэдээсэл согсолһон хоморой шухаг хэблэлнүүд тухай хөөрэжэ үгөө.
Буряад Уласай соёлой яаманай мэдээсэлэй албанай гэрэл зураг
- Тус хуралдаан аргагүй үндэр хэмжээндэ үнгэрөө. Дэлхэйн олон ондоо гүрэнүүдэй түүхэ бэшэгүүдые шудалдаг эрдэмтэдтэй танилсаха азатай байгааб. Мүн Монголой Үндэһэнэй номой сангай монгол бэшэгэй жасатай танилсаһандаа баяртайб, - гэжэ Норжима Лубсанова тэмдэглэнэ.
Монголой Шэнжэлхы ухаанай хүреэлэн, Монгол Үндэһэнэй ехэ һургуули ба Монголой Үндэһэнэй номой сангай хамтаран эмхидхэһэн хуралдаанда Герман, Польшо, Япон, Солонгос, Хитад болон Ород Уласуудай номой сангай мэргэжэлтэд хабаадалсаа. Ород Уласые Буряадай Үндэһэнэй номой санһаа гадна, Ородой Эрдэмэй академиин Зүүн зүгэй гар бэшэмэлнүүдэй институт, Ородой Эрдэмэй академиин Сибириин таһагай Монгол, Буддын шажан, Түбэд шудалалгын институдай Зүүн зүгэй гар бэшэмэлнүүдэй болон ксилографуудай түб, Москвагай гүрэнэй Багшанарай ехэ һургуули болон Буряадай гүрэнэй ехэ һургуули түлөөлөө.
