1141
Сентябриин 6-да ZAM гэһэн этно-дэлгүүртэ Ородой Холбоото Уласай арадай зүжэгшэн, Буряадай гүрэнэй Оперо болон баледэй театрай уран һайханай хүтэлбэрилэгшэ Дарима Линховоинтой уулзалга болохонь. Дарима Лхасарановна театрайнгаа ажал ябуулга тухай мэдээсэхэһээ гадна, дууриин дуушадые бэлдэхэ, тэдээнтэй хүдэлхэдэ, ямар гээшэб гэжэ хөөрэхэ хүсэлтэй. Гадна театрайнгаа шэнэ хаһада бэелүүлхэ түсэбүүд тухайгаа, тэрэ тоодо Лхасаран Линховоиной нэрэмжэтэ Дууриин ехэ нааданда хэр зэргэ бэлдэжэ байһан тушаа дуулгаха.
Агууехэ дуушанай түрэһөөр 95 жэлэй ойдо зорюулагдаһан тус арга хэмжээнэй үедэ дэлхэйдэ мэдээжэ дуушадай хабаадалгатай дүрбэн дууриин зүжэг Буряадай Оперо болон баледэй театрай тайзан дээрэ харуулагдаха юм. Мариинскэ театрай гол дуушад Юлия Маточкина, Владимир Сулимский, Буряад болон Монгол Уласуудай габьяата зүжэгшэн Ганбаатарын Ариунбаатар, Красноярскын Оперо болон баледэй театрай гол дуушан, Буряад Уласай габьяата зүжэгшэн Михаил Пирогов, Татарстанай Оперо болон баледэй театрай гол дуушан Венера Протасова, Мариинскэ театрай Залуу дууриин дуушадай академиин түлөөлэгшэд Аюна Базаргуруева, Савва Хастаев, Монголой Оперо болон баледэй театрай гол дуушан Бямбажавын Гомбо-Очир гэгшэд урилгаар ерэжэ, зүжэгүүдтэ хабаадаха.
Тус уулзалгада ерэгшэд алдарта эсэгынгээ арюун хэрэг үргэлжэлүүлжэ ябаһан Дарима Линховоиндо асуудалнуудые табижа, зохёохы намтарайнь ялас гэмэ хуудаһануудые хамта иралсаха, мүн дурасхаал болгон, гэрэл зурагташье орохо аргатай байха.
Буряадай гүрэнэй Оперо болон баледэй театр 80-дахи хаһаяа эхилхэ гэжэ бэлэдхэл хэжэ байна гэжэ һануулалтай.
Буряад Уласай соёлой яаманай мэдээсэлэй албанай гэрэл зураг
