​Буряад ороной “Улаалзай” ансамбль Болгарида болоһон уласхоорондын ехэ нааданай гол шанда хүртөө

Түнхэн аймагай Хэрэн һууринай “Улаалзай” гэһэн хатарай бүлгэм август һарада Болгариин Варна хотодо үнгэрһэн “Дэлхэй. Уралиг ба далай” (Мир. Искусство и море) гэһэн  хүүгэдэй уран бэлигэй уласхоорондын VIII ехэ нааданда илалта туйлажа, нютагаа бусаба.

- Манай ансамбль “Арадай хатар” гэһэн номинацида наһанай хоёр хубаарида (10-тайһаа 12-той болотор, 12-тойһоо 15-тай болотор) I шатын лауреат болоо. Удаань ехэ нааданай гол шан – Гран-при абаһан тухаймнай соносхоходоо, хатараймнай найруулгын онсо һайханиие ба хубсаһа хунараймнай ялас гэмэ үзэмжэтэйе тэмдэглээ. Энэ хадаа бидэндэ аргагүй ехэ туйлалта гээшэ. Уласхоорондын ехэ нааданда Гран-при шан абахаһаа урид Эрхүү, Екатеринбург, Санкт-Петербург хотонуудаар ябажа, абьяас бэлигээ гэршэлээ һэмди. Тиимэһээ үхибүүднай тайзанһаа зүрхэ алдадаггүй, гэбэшье Хэрэндэмнай соёлой байшан үгы, тайзан дээрэ гаража, бэлэдхэл хэхэ арга боломжогүйбди. Харин Болгарида 100 дүрбэлжэн метрэй асасри томо тайзан дээрэ гараашье һаа, үхибүүднай түдэгэсэнгүй, бүхы бэлиг шадабарияа харуулжа шадаа, - гээд, ансамблиин хүтэлбэрилэгшэ Эржена Бардуева хөөрэнэ.

Эржена Бардуевагай хэлэһээр, хатаршадһаа гадна, пианино дээрэ хүгжэмдэдэг гурбан басагад Буряад ороноо тус ехэ нааданда түлөөлөө. Мүн лэ Түнхэнһөө ошоһон тэдэ басагад I болон II шатын лауреадууд болоо.

Буряад Уласай соёлой яаманай мэдээсэлэй албанай гэрэл зураг