864
Хяагта хотодо “Соёл” гэһэн үндэһэн түсэлөөр сентябриин 27-до виртуальна тоглолтын танхим нээгдэхэ. Түрүү филармонинуудай ба дэлхэйн театрнуудай тоглолтонуудые шууд эфиртэ хотын 20 мянган ажаһуугшад хараха аргатай болохо.
Академик В.А. Обручевай нэрэмжэтэ Хяагтын хизаар ороноо шэнжэлэлгын музейн байшанда тоглолтын танхим байгуулагдаха. Хүгжэмэй программанууд онлайн аргаар дамжуулагдажа байха, мүн тиихэдэ тэрэнэй буулгабари хэхээр. Нэгэ доро энэ тоглолто 120 хүн хараха аргатай.
Ородой Холбоото Уласай Соёлой яаман грантын 500 мянган түхэригөөр хэрэгтэй тоног түхеэрэмжэ: проектор, дэлгэсэ, эдэбхитэй акустикын системэ, операторай техникэ, гэр ажахын бараа худалдан абаа, мүн баһа техникын ба хабсарха ажалнууд хэгдээ юм.
- Манай хотын ажабайдалда виртуальна тоглолтын танхимай нээлгэн хадаа ехэ үйлэ хэрэг болоно. Мүнөө классическа хүгжэмдэ дуратайшуул аймагһаа гарангүй, дэлхэйн уралигтай ёһо хүндэлһэн түлбэреэр танилсаха, шагнаха аргатай болобо, - гэжэ Хяагтын музейн экскурсионно-ниитын таһагай даагша Наталья Парнякова хэлээ.
Виртуальна тоглолтын танхим байгуулха талаар түсэлдэ 30 можо нютагууд болон филармонинууд нэгэдээ гээд тэмдэглэлтэй.
Улаан-Үдэдэ виртуальна тоглолтын түрүүшын танхим 2014 онһоо Буряадай гүрэнэй филармонидо хүдэлдэг. Шууд дамжуулганууд һарадаа 2-3 дахин үнгэргэгдэдэг.
“Соёл” гэһэн үндэһэн түсэл бэелүүлгэдэ Буряад Уласта 788 сая түхэриг шэглүүлэгдээ. Түсэлөөр ГАЗон Next маркын автоклуб -ашаанай авто – трансформер энэ намартаа Кабанск, Сэлэнгэ, Бэшүүр, Захаамин аймагуудта хүрэжэ ерэхэ. Тиихэдэ Ярууна, Хяагта, Захаамин аймагуудта соёлой дүрбэн байшангуудта ехэ заһабарилганууд хэгдэхэ. Номой модельнэ табан сан Хэжэнгэ, Загарай аймагуудта, Северобайкальскада, Улаан-Үдэдэ ба Хяагтын-Адагай хүүгэдэй номой сан байгуулагдаха юм.
2024 он болотор бэелүүлэгдэхэ “Соёл” үндэһэн түсэл Ородой Холбоото Уласай Юрэнхылэгшын “майн”зарлиг дүүргэхэ талаар зохёогдожо баталагдаһан юм.
Буряад Уласай соёлой яаманай мэдээсэлэй албанай гэрэл зураг
