1585
Буряад уласта анха түрүүшынхиеэ үнгэргэгдэһэн «Уран хэлэтэнэй урилдаанда» хабаадагшад шэнэ номой авторнууд болон мэдээсэгшэд болоһон байна. Уласай нэгэдэхи «Уран хэлэтэнэй урилдаанай» хабаадагшад мүрысөөндэ оролсоходоо, өөһэдынгөө зохёоһон үреэлнүүдые хэлэжэ, олоной дунда дэлгэрээгүй тоолуурнууд болон жороо үгэнүүдые бэдэржэ, уншаһан байна.
Энэ хэмжээ ябуулга Сагаалганай урид болоо һэн. Мүрысэгшэд «Yреэлнүүд», «Жороо үгэнүүд», «Тоолуурнууд» гэһэн гурбан номинацида хаба шадалаа туршаа. Тиихэдэ Буряад уласай, Усть-Ордын болон Агын Буряадай тойрогуудай, Шэнэхээнэй ажаһуугшадһаа мүрысөөндэ хабаадалсаха тухай 276 мэдүүлгэ ороһон байна.
Буряад Уласай соёлой яаман болон Буряадай арадай уран бүтээлэй түб «Уран хэлэтэнэй урилдаан» гэһэн хэмжээ ябуулга эмхидхэн байгуулжа, үнгэргөө гээд тэмдэглэлтэй.
– Һайндэрнүүд, баярай хэмжээ ябуулганууд үреэлгүйгөөр үнгэрдэггүй. Арадай дунда үреэл үгэнүүд үргэнөөр дэлгэржэ, хэрэглэгдэһээр. Харамтайнь гэхэдэ, багашуулда хабаатай эрхэлүүлэлгэнүүд, зугаалалганууд, тоолуурнууд, жороо үгэнүүд, оогололгонууд хэрэглэгдэхэеэ болижо, үгы шахуу болонхой. «Сагаан һарын бэлэг» багахан хэмжүүртэй ном. Сагаалганай һайндэрнүүдтэ үреэл үгэнүүдые энэ номһоо уншахаар. 700 хэһэгээр гараһан номой хахадынь Сагаан һарын һайндэрэй түрүүшын үдэрнүүдтэ худалдагдаа», – гэжэ Буряад Уласай арадай уран бүтэлээлэй түбэй мэргэжэлтэд хэлэбэ.
Буряад Уласай соёлой яаманай мэдээсэлэй албанай гэрэл зураг
