​​Сагаалган – Кремльдэ

Москвада Буряад Уласай Соёлой үдэрнүүд февралиин 24-26-да Гүрэнэй Кремлиин Ордон соо үргэн дэлисэтэйгээр үнгэргэгдэхэ.

Гүрэн түрымнай эгээл ехэ тайзан Гүрэнэй Кремлиин Ордон соо оршодог. Энэ ехэ тайзан дээрэ Буряад Уласнай Соёлой болон урлалайнгаа үдэрнүүдые түрүүшынхиеэ үнгэргэхэнь. Зүүн зүгэй арадуудай литээр 12 жэлэй ахалагша ама сагаан Хулгана жэлэй бууха февралиин 25-26-да Буряадаймнай зохёохы эрхим бүлгэмүүд болон уран зураашад ниислэл хотын зондо Буряадта ажаһуудаг арадуудайнгаа үндэһэн соёлые үргэнөөр харуулха.

Буряад ламанарай хэлэһээр, Гүрэнэй Кремлиин Ордон соо Шэнэ жэл угталган гүн ехэ удха шанартай. Тайзан дээрэ тоглогшод болон харагшад буддын мандалын – Сансарын хубинууд болохо ха юм. 300 гаран артистнууд, дэлхэйдэ суурхаһан уран зурааша Даша Намдаков, Зорикто Доржиев, Жигжит Баясхаланов гэгшэд түрэл Буряадайнгаа хүгжэлтын дээжые олоной анхаралда дэлгэн гэршэлхэ.

Гүрэнэй Кремлиин Ордоной тайзан дээрэ классическа болон арадай аялга хүгжэм, хатар нааданууд, мультимедийнэ болон анимационно шэмэглэл – эдэ бүгэдэ арюун Байгал далайн эрьедэхи уужам тала, хүжэ ногоон тайга, орьёл хадануудтахи тэрэнгиин хоншуу хангал мэдүүлхэ. Нэмэжэ хэлэхэдэ, биледүүдэй сэн даншье үнэтэй бэшэ - 200-һаа 4 мянга хахад түхэригөөр худалдагдана. 

Анна Огороднигой гэрэл зураг