1038
2020 ондо Тайваниин Тайбэй хотодо буряадай соёл уралигта зорюулагдаһан үдэрнүүд эмхидхэгдэхэ. Тэрэнэй хэмжээндэ Буряад уласта буулгагдаһан фильмнүүд харуулагдаха гэжэ Буряадай кинематографистнуудай эблэлэй түрүүлэгшэ Артём Бурлов Facebook хуудаһандаа олондо дуулгаба.
Тиихэдэ «Азия Фильмс» кинокомпаниин буулгаһан кино олоной һонорто дурадхагдаха. Гэхэтэй хамта фильмнүүд субтитрнуудтай харуулагдаха юм. Тиимэһээ англи болон хитад хэлэнүүдтэ тэдэ оршуулагдаха.
- Хитад, англи хэлэнүүдээр субтитрнуудые харуулхын тула, бүхы фильм оршуулха хэрэгтэй. Тиихэдэ Тайвань олтирогой соёлой яаман фильмнүүдэй оршуулгануудые эртээнһээ эльгээхыень дурадхаа. Юуб гэхэдэ, тэндэ цензура бии, - гэжэ Артём Бурлов бэшээ.
Оршуулагшад хабаадаха гэбэл, өөртэнь хандаха гэжэ Артём Бурлов тэмдэглэбэ. Энэ ажалда мүнгэн һомологдоногүй, тиимэһээ тэдэнэй ажал хямда сэнгээр түлэгдэхэ гэжэ тэрэ онсолбо.
Артём Бурловай Facebook хуудаһанһаа гэрэл зураг абтаба
