​Габановай габьяа

Һаяхана Москва хотодо Ородой Холбоото Уласай Засагай газарай “Душа России” гэһэн шан арадай уралиг хүгжөөхэ хэрэгтэ өөрынгөө хубита оруулһан габьяатанда барюулагдаба. Тэдэнэй тоодо Буряад ороной үльгэршэн Бадма Габанов оролсоо.

Россиин соёлой сайдай орлогшо Николай Овсиенко 17-дохиёо үнгэргэгдэжэ байһан энэ баяр ёһололдо хабаадагшадые амаршалхадаа: “Та олон Ород Уласай һүр һүлдэнь болонот”, - гэжэ тэмдэглээ.

Бадма Габанов наһан соогоо хүдөө ажахыда хүдэлһэн, хүтэлбэрилхы тушаалнуудташье ябаһан юм. 68 наһатай болотороо Москва хото үзөөгүй ябаһан аад, одоошье мүнөө шан абаха шалтагтай тиишээ зорёо ха юм.

- Телевизорээр майн 9-эй жагсаал харахадаа, тиимэ олон сэрэгшэд яажа багтадаг юм – Улаан талмай аргагүй ехэ байгаа ёһотой гэжэ һанадаг байгааб. Теэд өөрөө ошоод үзэн гэхэдэ, үнэн дээрэ багахан байна. Ленинэй мавзолей орооб. Москва ошоо һаа, тэрэниие заатагүй харахаб гэжэ һанадаг байһан хүм, - гээд, Бадма Сыренович ниислэл хотоор ябаха аргын тудаһанда баясан хөөрэнэ.

Аха аймагай Хара-Хужар нютаг тоонтотой Бадма Габановай нэрэ түрэл Буряад орон дотороо мэдээжэ юм. Хара багаһаа үльгэр түүрээдэг, аргагүй гоёор дууладаг хүн юм. 2006 ондо уласхоорондын “Алтаргана” ехэ нааданай лауреат болохоһоо гадна олон тоото урилдаа мүрысөөнүүдтэ илалта туйлаһан намтартай. “Душа России” гэһэн шанда тэрээнтэй хамта 15 хүн хүртэжэ, тус бүридөө 100 мянган түхэригөөр урмашуулагдаа.

Байкалфолк.рф сайтһаа гэрэл зураг абтаба