​​Буряадууд – Улаан талмайда

Москва хотодо “Алас Дурнын яармаг” ажалаа эхилээ. Дуу болон хатарай “Байгал” театр Арбат дээрэ декабриин 2-һоо 8 болотор үдэр бүхэндэ “Байгал. Буряад орон. Ерээдүй” гэһэн тоглолто үгэхэ юм.

Урдаа хараха театраймнай хатаршад ниислэл хотын ажаһуугшадта болон айлшадта урданай болон мүнөөнэй буряад хатарнуудые дурадхаха. Нэрэтэй солотой дуушад, тэрэ тоодо Бадма-Ханда Аюшеева болон Буряадай үндэһэтэнэй оркестрын хүгжэмшэд дуу хүгжэмөөрөө хужарлуулха. Мүн үдэр бүхэндэ Буряад орон тухай викторина үнгэргэгдэхэ гэжэ Буряадай Толгойлогшын болон Засагай газарай хэблэлэй албан мэдээсэнэ.

“Алас Дурнын яармаг” Москва хотодо гурбадахияа үнгэргэгдэнэ гэжэ һануулая. Алас Дурна тойрогой 11 можо нютаг ниислэл хотын ажаһуугшадые болон айлшадые нютаг нютагайнгаа эдеэ хоолтой, гарай бэлэгүүдтэй, арадайнгаа соёл уралигтай танилсуулха. Мүн элдэб янзын мастер- классуудые, хүүгэдэй наадануудые болон урилдаануудые эмхидхэхэ.

facebook/Baikal Atv сайтһаа гэрэл зураг абтаба