Энэ жэл Монгол Уласай дээдэ шагнал, түрүү зэргын «Чингис хаан» одон «The Hu» хамталигта олгогдохо болоһон тухайнь Юрэнхылэгшын Захиргаанай дарга З.Энхболд һаяхана мэдээсэбэ.
Үндэһэн соёлойнгоо гайхамшагые дэлхэй дүүрэн дэлгэрүүлжэ, хүн түрэлтэнэй уралиг соёлой санда онсо үнгэ будаг бии болгожо байһан «The Hu» хамталиг «хүннү рок» урасхалаар зохёохы ажалаа эрхилнэ. Монгол Уласай габьяата зүжэгшэн Б.Дашдондогой үүсхэлээр байгуулагдаһан хамталиг мүнөө 11 гэшүүнтэй. Түрүүшынгээ бүтээл – «Yu ve yu ve yu» дуугаа - нёдондо youtube.com сайт дээрэ гаргаһаарнь жэл соо 26 сая хүн хараһан байна. «The Hu» хамталиг үнгэрэгшэ зун Европын 13 гүрэнөөр аяншалжа, тоглолтонуудаа хэһэн байна. Мүнөө Америкэ, Канада гүрэнүүдтэ уласхоорондын 60 гаран фестивальда хабаадахаһаа гадна, хубиингаа тоглолто эмхидхэнэ.
«Чингис хаан» одон Монгол Уласай хүгжэлтэдэ онсо габьяа гаргаһан хүнүүдтэ, байгуулгануудта олгогдодог. Тиигэжэ 2005 онһоо хойшо 11 хүн түрүү зэргын тус одонгоор шагнагдаһан байна. Тэдэнэй дунда Монгол Уласай Юрэнхылэгшэ байһан П.Очирбат, Н.Багабанди, Юрэнхы сайд байһан Д.Бямбасүрэн, Д.Содном, хүгжэмэй зохёолшо Б.Шарав, дуушан Г.Ариунбаатар, тамиршан Н.Түвшинбаяр гэгшэд бии.
Жэл бүри үбэлэй тэргүүн һарын шэнын 1-дэ гү, али Чингис хаанай мүндэлһэн үдэр – Монгол бахархалай үдэр – «Чингис хаан» одон олгохо баяр ёһолол эмхидхэгдэдэг юм. Байгша ондо тэрэнь ноябриин 27-до тохёолдобо.
last.fm сайтһаа гэрэл зураг абтаба