601
Ноябриин 19-дэ Улаан-Үдэ хотын түб талмай дээрэ һонирхол татама үйлэ хэрэг болобо. Юуб гэхэдэ, “Соёл” гэжэ үндэһэн түсэлэй ёһоор энэ байгша онһоо эхилжэ 2024 он болотор “Автоклуб” авто-унаанууд Буряад Уласаймнай аймагуудта дамжуулагдажа байха.
Уридшалан хэлэхэдэ, соёлой сайдай уялгые дүүргэгшэ Николай Емонаков хадаа энэ нүүдэл соёлой байшан байгша ондо 4-дэхи болобошье, мүнөө жэлдээ һүүлшын унаа гэжэ тобшолоо һэн.
5 сая түхэригтэ авто-унаагай түлхюурые Буряад Уласай Арадай Хуралай Түрүүлэгшэ Владимир Павлов Бэшүүрэй аймагай гулваа Василий Смолиндо барюулһан байна.
-“Соёлой оршон байдал” гэжэ түсэлэй ёһоор, аймагуудай соёлшодто авто-унаанууд үгтэнэ, юуб гэхэдэ, тэдэнэр соёлой байшангүй гү, али холын холоһоо боложо, концерт наадантай харилсажа байдаггүй тулань энэ автоклуб тон хэрэгтэй зөөри, - гэжэ Владимир Павлов хэлээ. – Бэшүүрэй аймагай соёлшодто иимэ өөрын авто-унаатай болоһониинь һайн үйлэ хэрэг. Тэндэ нэгэ жэлэй туршада олон тоото һайндэрнүүд үнгэргэгдэжэ байдаг, ехэнхидээ “нээмэл газарта” гэжэ нэршэнхэй. Тиимэһээ мүнөө артистнуудаа алишье байра газар руугаа абаашаха аргатай, энэ авто-унаань өөрын тайзантай ба хүгжэм дуутай юм. Энэ жэлэй дүүрэтэр энэ авто-унаагаа тон ехээр хэрэглэхэ байха гэжэ найдагдана.
“Бэшүүрэй аймаг” МО-гой гулваа Василий Смолин иигэжэ хэлэбэ:
- Бидэ мүнөө жэлдэ иимэ авто-унаатай болоһонойхии декабрь һарын дүүрэтэр “Бүхы гэр байрануудта Шэнэ жэл” гэһэн һайндэр үнгэргэхөө түсэблэнхэйбди. Аймаг доторнай 16 тон багахан хэмжүүртэй нютагууд бии, тиишээ хамтадаа ошожо байхабди. Соёлшодаймнай арад зонтоёо уулзаха аргатай болоһониинь ехэ һайшаалтай. Энэ авто-унаа хүдөө нютагуудай ажабайдал таатай, хүхюутэй болгохо гэжэ найданаб. Тиин хүршэ аймагтаяа хамта үбэлэй загаһа барилганда гараха гэһэн хэлсээ баталаабди.
Тус хэмжээ ябуулгын удаа Бэшүүрэй аймагһаа ерэһэн бүлэг артистнуудай ансамбль ба оперын дуушан Данзан Бальжинимаев гэгшэд дуу, хатараа гүйсэдхэжэ, халуун альга ташалганда хүртэһэн байна.
Алексей Жилинэй гэрэл зураг
Автор: Бато-Цырен ДУГАРОВ
