967
Октябриин 30-да Буряадай үндэһэтэнэй 1-дэхи лицей-интернадта “Найрамдалай дугы” гэһэн үндэһэн соёлой уласхоорондын табадахи фестиваль эхилээ.
Хэмжээ ябуулгада холо ойроһоо 150 хүүгэд айлшалжа хабаадаа. Улаан-Баатарһаа Ородой-Монголой һургуулиин, Нерюнгри хотоһоо “Арктика” гэһэн туршалгын һургуулиин, Саха (Яхад) Уласһаа Сангарска гимназиин болон Мастахска һургуулиин, Эрхүү можын Братск хотоһоо В.Г.Распутинай нэрэмжэтэ 12-дохи дунда һургуулиин һурагшад ерээ. Мүн тиихэдэ Буряадай үндэһэн соёлой һургуулинуудай эблэлдэ ородог һургуулинууд эдэбхитэйгээр хабаадаа.
Саха (Яхад) Уласай ЮНЕСКО-гэй хэрэгүүдэй талаар хорооной суг түрүүлэгшэ, Ородой Холбоото Уласай ЮНЕСКО-гэй эблэлэй һургуулинуудые тогтоохо талаар “Саха – Байкал” түсэлэй залан хүтэлбэрилэгшэ Елизавета Сидорова фестивалиин хүндэтэ айлшанаар уригдаа.
Хүүгэд үндэһэн соёлой түсэлнүүдые болон шэнжэлгэнүүдые дурадхаа. Жэшээнь, Буряадай үндэһэтэнэй 1-дэхи лицей-интернадай һурагшад “Арадуудай хүндэмүүшэ зангай тэмдэгүүд” түсэлтэй танилсуулаа. Братскын 12-дохи һургуулиин һурагша Герман Коренев ородуудай модоор уран барилга тухай хөөрөө.
Бүхыдөө үндэһэн соёлоор 24 түсэл болон 74 шэнжэлхы ажал дурадхагдаа. Фестивалиин түгэсхэлдэ хүүгэд “Монгол бичиг”, “Шатар наадан”, һарлагай нооһоор аргамжа гүрэлгэ, ханын панно бүтээлгэ болон бусад мастер-классуудта хабаадаа.
- Фестиваль хүмүүжүүлгын ехэ үүргэтэй. Үхибүүд бэе бэеэ үндэһэн соёлтоёо танилсуулна. Росси – олон арадуудай ажаһуудаг мантан ехэ гүрэн. Тиимэһээ гүрэн соохи байдалнай арадуудай хоорондохи харилсаа холбоонһоо дулдыдаха, - гэжэ Буряадай Болбосоролой болон эрдэм ухаанай яаманай Хиналтын хорооной түрүүлэгшэ Батор Цыренжапов онсолоо.
Хэмжээ ябуулга “Буряад хэлэ хамгаалга болон хүгжөөлгэ” гэһэн гүрэнэй программын хэмжээндэ үнгэргэгдэнэ гэжэ һануулая. Гол зорилгонь – Россиин болон дэлхэйн үндэһэн соёлой баялигуудтай хүүгэдые танилсуулха, бэе бэедээ тэсэмгэйгээр хүмүүжүүлхэ, хани харилсаатай болгохо.
2019 ондо Буряадай үндэһэтэнэй 1-дэхи лицей-интернат ЮНЕСКО-гэй эблэлэй 9,5 мянган һургуулинуудай тоодо ороо гэжэ һануулая. Фестивалиин түгэсхэлэй үдэр, октябриин 31-дэ, үнэмшэлгэнь барюулагдаа юм.
Буряад Уласай болбосоролой болон эрдэм ухаанай яаманай мэдээсэлэй албанай гэрэл зурагууд
