​​Бэшүүрэйхин түрүүлээ

Шангай 2-дохи һуурида гараһан Хэжэнгын үхибүүд

Октябриин 26-да Буддын шажанай Заншалта Сангхын “Эхэ хэлэн – манай баялиг” урилдаан 31-дэхиеэ үнгэргэгдэбэ. Энэ удаа Буряад Уласай Толгойлогшын болон Засагай газарай Захиргаан, “Буряад үнэн” Хэблэлэй байшан эбээн тэдхэгшэд болоо.

Ивалгын дасанай ехэ һургуулида 82 бүлгэм – 700-гаад үхибүүд сугларжа, эрхимүүдээ элирүүлээ. Урматайнь гэхэдэ, тэдэнэй хахадынь шахуу Улаан-Үдэ хотын һургуулинуудай һурагшад болоно.

Урилдаанай дүнгүүдээр, Бэшүүр аймагай Харланай үхибүүдэй бүлгэм бүхыдөө 114,1 балл абажа, 1-дэхи һуури эзэлээ. Энэ хадаа 13-дахи илалтань гээшэ. Харланай сомоной дарга Бэлигто Жигжитов мэргэжэлээрээ зоотехникшье һаа, тус урилдаанай анха түрүүшынхиеэ эмхидхэгдэхэһээ эхилээд, мүнөө болотор үхибүүдээ бэлдэжэ хабаадуулдаг юм.

Урилдаанай үедэ тэдэнь сонгоол нютаг хэлэн дээрээ тордиһогүйгөөр ярижа, харюусажа байгаад һэн. Бэлэдхэл һайтай гэжэ абаһаар лэ тобшолхоор. Зүгөөр, Бэлигто Дамбиевичай хэлэһээр, литературна хэлэн дээрэ уншажа шадахагүй, ойлгодоггүй.

“6-дахи ангиин һурагшад Петухова Катя Дагбаева Айлана хоёр мүнөө дээрээ эхэ хэлэндээ тон бэрхэнүүднай. Бүхы юумэеэ сээжэлдээд, оролдосотойгоор бэлдээд, ехэ дуратайгаар хабаададаг”, - гэжэ Харланай үхибүүдэй бүлгэмэй урагшаа һанаатай хүтэлбэрилэгшэ хэлээ.

Удаадахи шангай һууринуудые Хэжэнгэ аймагай Хоца Намсараевай нэрэмжэтэ Хэжэнгын дунда һургуулиин хоёр бүлгэм эзэлээ. "Жэмбүүр" 113,6 балл абажа, илагшадта оройдоол хахад баллаар шүүгдээ. Харин “Урагшаа” бүлгэм 112,3 баллтайгаар урилдаагаа түгэсхөө.

Эдэ хүүгэд - “Зүрхэнэй дуунууд” гэһэн уран бэлигтэнэй зохёохы студиин гэшүүд. Шүлэг, хөөрөөнүүдые зохёодог, дууладаг, буряад хэлээр элдэб янзын урилдаануудта хабаададаг үнэхөөр бэрхэнүүд юм. Хүтэлбэрилэгшынь, буряад хэлэнэй багша Дашама Доржиевагай онсолһоор, энэ удаа дэлгүүрэй арһа хэрэглэһэнһээ боложо, гэдэргээ гараһандаа тэдэ ехэ халаглана. Гар элдүүритэй арһанай түлөө 5 балл нэмэгдэдэг гэжэ һануулая.

Тус һургуулиин һурагшад жэл бүхэндэ шахуу хабаададаг. Заримдаа гурбаншье бүлгэм табидаг. Зүгөөр нэгэл дахин илалта туйлажа үзөө. Ехэнхидээ шангай гү, али урдуур һууринуудые эзэлдэг. “Эхэ хэлэн – манай баялиг” урилдаанда зорюута бэлдэлгэ хэдэг байна. Модошо дархан, оёдолшон, уран зурагай багша, дуушан гээд лэ үхибүүдтэ заажа үгэдэг. Мүн аймагай засаг дарга Геннадий Лхасаранов, һуралсалай таһагые даагша Сэсэгма Башенхаева, Хэжэнгын дасанай шэрээтэ Гармажаб ламхай, һургуулиин захирал Дамдин Найданов гэгшэд бүримүһэн дэмжэдэг.

“Һая эхилжэ байхада, хүндэшэг һэн. Харин мүнөө үхибүүднай һурамхи болонхой. Үнгэрхэдөө “Бэлигүүн толиие” сонгоол нютаг хэлэн дээрэнь ойлгожорхидог. Энэ урилдаанда ехэ дуратайгаар, одоол буляалдажа байгаад оролсодог. Ходо амжалта туйладаг һурагшад гэхэдэ, хамбын һургаалаар һайн дүнгүүдые харуулдаг Батуева Юля болон Дулмажапова Аня, уран барималда эрхимлэдэг Рампилова Адиса, тиихэдэ ехэ балл асардаг Доржиева Санжима гээд лэ булта бэрхэл даа”, - гэжэ Дашама Дугаровна тэмдэглээ.

Дашама ДОРЖИЕВАГАЙ дурадхаһан гэрэл зураг