​​Улас түрын уян сэдьхэл

Аха нютаг тоонтотой арадай дуушан Бадма Габанов Ородой Холбоото Уласай Засагай газарай «Ород гүрэнэй уян сэдьхэл» гэһэн шанда хүртөө. Гүрэнэй Засагай газарай захирамжаар холын хадата аймагта ажаһуудаг алдарта дуушанда «Арадай заншалта соёл» шэглэлээр шан олгогдоо. Булган талата Буряаднай, буурал түүхэтэй араднай, мүнгэн дуулгата Саяамнай, мүнхын аршаанта Байгалнай мүшэтэ замби хүрэтэр суурхабал!

Зүблэлтэ засагай хүсэндөө байхада, Бадма Сыренович хүдөө ажахын һалбарида олон жэлдэ ажаллаһан. Хамтын ажахын түрүүлэгшэ боложо, нютагайнгаа зониие ударидаһан намтартай. Гүрэн дотор засаг хубилжа, түрын байгуулалтын һэлгэлдэхэдэ, хамтын ажахынуудшье тараа. Газар уһандаа, адууһа малдаа хүнүүд эзэн боложо захалаа һэн. Шэрүүн уларилтай үндэр газарта үдэһэн, нютагаа болон арад зоноо һайн мэдэдэг Бадма Габанов шэнэ сагай эрхэ байдалһаа сухаряагүй. Олзын хэрэг эрхилдэг малшанай ажахы байгуулаад, гэр бүлөөрөө хүдэлмэрилөө.

Хара багаһаа дуунда дуратай Бадма Габанов уран һайханай харалгануудта хабаадажа, уласай ниислэл руу уригдадаг болоһон. Уданшьегүй «Алтаргана» нааданда хабаадалсажа, «Алтан гургалдай» гэһэн урилдаанай илагша болон тодорһон юм. Тэрэ гэһэнһээ хойшо урилдаанууд болон элдэб мүрысөөнүүд арадай дуушанай ажабайдалда замханагүй. Дабтагдашагүй хоолойгоороо арадай дуунуудые хангюурдахаһаа гадуур, үни хада мартагдаһан «Шоно баатар» үльгэр өөрөө оложо, хуушан янзаарнь тэрэниие дуулан түүрээхэ маягыень арад зондоо бусаажа шадаһан габьяатай. «Ород гүрэнэй уян сэдьхэл» гэһэн шан барюулгын баяр ёһолол декабрь һарада Москва хотодо үнгэрхэ гээд, Бадма Габановые тус шанда дэбжүүлһэн Буряадай Арадай уран бэлигэй түбэй мэргэжэлтэд мэдээсэнэ.

Аха аймагай соёлой хүтэлбэриин дурадхаһан гэрэл зураг