​​Үхибүүдэй түлөө үүсхэл гаргагдаа

Эдэ үдэрнүүдтэ Буряад Уласай Болбосоролой болон эрдэм ухаанай яаманай мүнгэн дэмжэлгээр буряад хэлэн дээрэ “Бэрхэшүүл” гэһэн хүүгэдэй соо шэнэхэн сэтгүүл хэблэлһээ гарахань. Энэ хадаа “Буряад үнэн” Хэблэлэй байшанай хоёрдохи туршалга гээшэ. 1998 ондо буряад, ород, англи хэлэнүүд дээрэ “Одон” сэтгүүл мүндэлөө һэн гэжэ һануулая. Теэд 2014 ондо һүүлшын дугаарынь хэблэгдээ.

“Бэрхэшүүл” сэтгүүл эдир уншагшадта һонирхолтой байха гэжэ һанагдана. Һургуулиин болон хүүгэдэй сэсэрлигэй хүүгэд тухай мүнөө үеын аниме, түүхэ домог зураглаһан комикс, амжалта туйлаһан үхибүүд тухай зураглалнууд, юрэ бусын үзэгдэлнүүд, һонин баримтанууд, мэдээжэ хүнүүдэй мэргэн зүбшэл, уран зурагай хэшээл, онтохон, хошон зугаа, кроссворд, ребус... Шадаха зэргээрээ хүүгэдэй дура, һонирхол татахаяа оролдообди.

Энэ хэрэг “Буряад үнэн” Хэблэлэй байшанай захирал Баир Шираповай холын хараатай үүсхэлээр, зоригтой жүдхэмжөөр бүтэбэ гэхэдэ, алдуу болохогүй. “Шүдэеэ хам зуугаад хүдэлэгты, бэеэ һула бү табигты, бү маргагты, шадахат, бэрхэнүүдта”, - гэхэ мэтээр хэрэгтэй сагтамнай зэмэлээдшье, урмашуулаадшье хүдэлгөө. Эмхидхэлэй бүхы ажал бата ээм дээрээ даажа гараа.

Мүнөө энэ сэтгүүлдэ бүхы бэлиг шадабарияа, зүрхэ сэдьхэлээ зорюулһан хүнүүдтэй танилсуулая.

Харюусалгата секретарь – Ородой Холбоото Уласай гэгээрэлэй отличник, Хэжэнгын Хоца Намсараевай нэрэмжэтэ дунда һургуулиин буряад хэлэнэй багша Дашама Доржиева. Тон эдэбхитэй, урагшаа һанаатай, һэншье гэнгүй, юушье зохёожорхихо, тэрэ дороо оршуулжархиха ехэ бэрхэ хүн.

Энэл һургуулиин харуулшан Александр Мешков Бабжа-Барас баатар тухай комикс ехэ гоёор зураа. Мэргэжэлтэ зураашан бэшэшье һаа, угай бэлигтэй хүн юм.

Хүүгэдэй уран зураашан Алёна Цыденова бултанда мэдээжэ ёһотой. Хэдышье сүлөөгүй һаа, “Аха дүү” гэжэ нэрэтэй аниме зураа. Сэтгүүл соохи бүхы зурагууд – эдэ хоёр нүхэдэймнай бүтээлнүүд гээшэ.

“Буряад үнэн” Хэблэлэй байшанай дүй дүршэлтэй, бэлигтэй дизайнер Аркадий Батомункуев сэтгүүл эблүүлжэ, шэмэглэжэ, гоё һайхан түхэл шарай олгоо.

Эндэ үшөө нэгэ хүниие дурдаха дуран хүрэнэ. Энэ хадаа дулаахан үгөөрөө, туһатай заабаринуудаараа ходо дүнгэжэ ябадаг манай бэлигтэй эгэшэ нүхэрнай, олон жэлнүүдтэ “Буряад үнэн” сониной эрхилэгшэ байһан, мүнөө “Байгал” сэтгүүлые амжалта түгэс эрхилжэ ябаһан Галина Хандуевна Дашеева болоно. Хэһэн ажалыемнай хёрхо нюдөөрөө хаража, энэ-тэрэ алдуунуудыемнай заагаад, бүхыдөө һайн сэгнэлтэ үгөө юм.

Хүндэтэ уншагшад, “Бэрхэшүүл” сэтгүүлэй түрүүшын дугаар анхаралтайгаар шэнжээд, һанамжа дурадхалнуудаараа хубаалдахыетнай хүлеэхэбди. Мүн Буряад оронойнгоо бүхы хүүгэдэй бэе бэетэеэ танилсаха, бусад можо нютагуудта болон хари гүрэнүүдтэ ажаһуудаг үетэнтэеэ түрэл хэлэн дээрээ харилсаха талмай болгохо хүсэл бии. Эб хамта оролдожо, энэ зорилго бэелүүлэел даа гэжэ таанадаа уряалнабди.

Дыжид МАРХАДАЕВА