914
Байгша оной декабриин 2-8-ай үдэрнүүдтэ Москва хотодо гурбадахияа «Алас Дурнын яармаг» гэһэн үбэлэй наадан эмхидхэгдэхэ. Энэ хэмжээ ябуулгада «Байгал» театр Буряад уласаа түлөөлхэ юм.
Дуу, хатарай үндэһэн «Байгал» театрай хатаршад, хүгжэмшэд, дуушад гүрэнэй ниислэл хотын ажаһуугшадые буряад аман зохёолой баялигтай танилсуулха. Тэдэнэр урданай, ёһо заншалай, мүнөө үедэ зохилдуулһан хатарнуудые, уртын дуунуудые гүйсэдхэхэ. Арадайнгаа алтан абдарай баялигтай Буряадай арадай артистка Бадма-Ханда Аюшеева, Болдын Ганцэрэн гэгшэд танилсуулха. Буряадай Үндэһэн оркестрэй хүгжэмшэд угсаатай арадайнгаа хүгжэмэй зэмсэгүүдээр ирагуу хүгжэм зэдэлүүлхэ. «Байгал» театрай зүжэгшэд үндэһэн хубсаһанайнгаа баялиг, зүүдхэлнүүдые олондо харуулха.
Алас Дурнын тойрогто ажаһуудаг арадууд ёһо заншал, соёл уралигаа харуулжа, яармагта хабаадаха. Шэнэ Арбат дээрэ хэдэн үдэрэй туршада хэмжээ ябуулагнууд үнгэргэгдэхэ. Тиихэдэ Алас Дурнын тойрогой ажаһуугшадай ажабайдалта танилсуулгын мастер-классууд, лекцинүүд эмхидхэгдэхэ.
Анна Огороднигой гэрэл зураг
